सासष्टी: मडगाव नगरपालिकेच्या तीन नव्या कचरावाहू कॉम्पॅक्टरचे २ ऑक्टोबर रोजी सार्वजनिक बांधकाम मंत्री तथा मडगावचे आमदार दिगंबर कामत यांच्या हस्ते उदघाटन करण्यात आले होते. या तीन कॉम्पॅक्टरची एकूण किंमत १.४१ कोटी रुपये असून त्यातील एक कॉम्पॅक्टर तांत्रिक बिघाडामुळे नगरपालिकेच्या गॅरेजमध्ये पडून आहे, अशी माहिती शॅडो कौन्सिलचे निमंत्रक तथा कॉंग्रेस नेते सावियो कुतिन्हो यांनी पत्रकारांना दिली.
उद्‌घाटनानंतर अवघ्या तीनच दिवसांत या कॉम्पॅक्टरमध्ये तांत्रिक दोष आढळून आला. सूत्रांनी सांगितल्यानुसार, पुणे येथील कंपनीला या विषयाची माहिती देण्यात आली आहे. या कंपनीचा मॅकेनिक येऊन नादुरुस्त झालेला भाग घेऊन पुण्याला गेला आहे.
त्यामुळे हा कॉम्पॅक्टर सध्या विनावापर पडून आहे, असे कुतिन्हो यांनी सांगितले. यासंदर्भात मडगावचे नगराध्यक्ष दामोदर शिरोडकर यांच्याशी संपर्क साधला असता त्यांनी सांगितले, की कॉम्पॅक्टरची दुरुस्ती युद्धपातळीवर सुरू आहे.
जेसीबीही लगेच पडला बंद
अशाप्रकारे निकामी झालेली अनेक वाहने नगरपालिकेच्या गॅरेजमध्ये धूळ खात पडून आहेत. मडगाव पालिकेने हल्लीच कचरा ढकलण्यासाठी जेसीबी विकत घेतला होता. तोसुद्धा लगेच बंद पडला. त्यानंतर भाड्याने जेसीबी घेऊन कचऱ्यासाठी त्याचा वापर केला. त्यामुळे नगरपालिकेवर कोट्यवधी रुपयांचा बोजा पडला, अशी माहिती कुतिन्हो यांनी दिली.
दुरुस्तीचे काम युद्धपातळीवर : नगराध्यक्ष
यासंदर्भात नगराध्यक्ष दामोदर शिरोडकर यांच्याशी संपर्क साधला असता त्यांनी सांगितले, की पुण्याहून इंजिनियर येऊन कॉम्पॅक्टरचा निकामी झालेला भाग दुरुस्त करून आणला असून तो बसविण्याचे काम सुरू आहे. उद्या सकाळपर्यंत कॉम्पॅक्टर रस्त्यावर धावताना दिसेल. कोणतीही टीका करताना त्या विषयाचा आधी अभ्यास करावा. विनाकारण लोकांची दिशाभूल करू नये, असेही शिरोडकर यांनी टीकाकारांना सुनावले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
