Goa Assembly Election 2027: भाजप-मगोप युतीचेच सरकार राज्यात पुन्हा येणार, सदानंद शेट तानावडेंनी व्यक्त केला विश्वास; विकासाला मिळणार नवी गती

सासष्टी: पश्चिम बंगाल, आसाम, पुदुचेरी या राज्यांमधील निवडणुकीत भाजपला ज्याप्रकारे बहुमत मिळाले, ते पाहता लोकांचा पंतप्रधान नरेंद्र मोदी यांच्यावर पूर्ण विश्वास आहे, हे स्पष्ट होत आहे. अशा स्थितीत २०२७ च्या गोव्यातील विधानसभा निवडणुकीत भाजप व मगोप युतीला पूर्ण बहुमत मिळेल, असा विश्वास राज्यसभा खासदार सदानंद शेट तानावडे यांनी व्यक्त केला.

रवींद्र भवनातील एका कार्यक्रमासाठी तानावडे आले होते. ते म्हणाले, भाजप-मगोप युती ही केंद्रातून झाली आहे. या घडीला युती आहे. त्यामुळेच भाजप-मगोप युतीचेच सरकार गोव्यात स्थापन होईल, हे आम्ही ठामपणे सांगू शकतो. तृणमूल काँग्रेसचे पश्चिम बंगालात तीनवेळा सरकार होते. मात्र, या काळात तिथे अनेक अत्याचार झाले. आयुष्यमान भारत, पंतप्रधान आवाससारख्या केंद्रीय योजनासुद्धा लोकांपर्यंत पोचविल्या नाहीत. बंगालात भाजपच्या अनेक कार्यकर्त्यांनी बलिदान दिले. त्यामुळे बंगालमधील सर्व लोक एकत्र आले व त्यांनी ममतांना धडा शिकवला, अशी प्रतिक्रिया तानावडे यांनी व्यक्त केली.

निवडणूक फेब्रुवारी २०२७ मध्येच

तानावडे म्हणाले, की जरी डिसेंबर २०२६ मध्ये गोव्यात विधानसभा निवडणुका होतील असे म्हटले जात असले, तरी ते शक्य नाही. निवडणूक फेब्रुवारी २०२७ मध्येच होईल. गोव्यासह उत्तर प्रदेश, उत्तराखंड, पूर्वांचलमधील राज्ये, पंजाब या राज्यांतीलही निवडणुका होतील, अशी शक्यता त्यांनी व्यक्त केली.