Goa Drug Case: तरुणाने घरातच लावली गांजाची झाडे; क्रिप्टो करन्सीत करायचा व्यवहार

रशियन तरुणाने पालये-पेडणे येथे भाड्याने घेतलेल्या जागेत गांजाची लागवड करून तो विदेशी ग्राहकांना डार्क वेब तसेच टेलिग्रॅम या सोशल साईट्सवरून विकत असल्याचे उघडकीस आले आहे. संशयित पेडणे तालुक्यातील काही नामांकित क्लबमध्ये तो डीजे म्हणून कार्यरत होता.

संशयित हा डार्क वेब व टेलिग्राम या सोशल मीडिया चॅनेलवरून विदेशी ग्राहकांना आकर्षित करायचा. तसेच पैशांचा व्यवहार हा क्रिप्टो चलनात व्हायचा. संशयित गांजाचे बियाणे हे कुरियरने आणायचा.

या बियाणाची आयातीसाठी आंतरराष्ट्रीय साइट्स तो वापरायचा. त्याने पालये-पेडणे येथे एक जागा घेतलेली. तिथे त्याने आपली लॅब (नर्सरी) उघडली होती. तेथूनच तो गांजाची लागवड करून हा नशेचा बाजार चालवायचा.

संशयित पत्नी व सहा वर्षांच्या मुलासोबत शिवोलीत वास्तव्यास होता. संशयित चोपडे येथे ग्राहकाला ड्रग्स पुरवठा करण्यासाठी येणार असल्याची माहिती पोलिसांना मिळालेली असता, छापा टाकून संशयितास एएनसीने त्यास अटक केली.

गोवा पोलिसांच्या अमली पदार्थ विरोधी पथकाने (एएनसी) चोपडे बस थांब्याजवळ अटक केलेल्या संशयिताचे नाव ईउर्ली कोरोतीन (४१) आहे. त्याच्याकडून पोलिसांनी १.०३ कोटी रुपयांचा २ किलो उच्च दर्जाचा गांजा जप्त केला. संशयिताजवळ १.७ किलो वजनाचे हायड्रोपोनिक वीड व ३०० ग्रॅम वजनाचे पोलेन्स जातीचे हायड्रोपोनिक वीड सापडले. या २ किलो मुद्देमालाचा बाजारभाव १.०३कोटी रुपये इतका आहे.