'तुमचे कुटुंब गुहेत होते, तुम्ही गोव्यात काय करत होता'? 'त्या' रशियन महिलेच्या प्रकरणावरून इस्रायली व्यापाऱ्याला कोर्टाने फटकारले

पणजी: गोव्यात वास्तव्यास असलेल्या एका इस्रायली व्यापाऱ्याला सर्वोच्च न्यायालयाने सोमवारी फटकारत विचारले ‘तुमचे कुटुंब गुहेत राहत असताना तुम्ही गोव्यात काय करत होता? संबंधित व्यापाऱ्याने आपल्या दोन मुलींच्या रशियाला परत पाठविण्याच्या आदेशाविरोधात याचिका दाखल केली होती.

न्यायमूर्ती सूर्यकांत आणि जॉयमल्या बागची यांच्या खंडपीठासमोर ही सुनावणी झाली. न्यायालयाने तीव्र नाराजी व्यक्त करत म्हटले, हा देश आता असा ‘सेफ हेवन’ बनला आहे, जिथे कोणीही येऊन राहू शकतो. न्यायालयाने व्यापाऱ्याला विचारले की, भारतात राहण्यासाठी त्याच्याकडे वैध कागदपत्रे आहेत का?

घटनेनुसार, रशियन नागरिक नीना कुटिना (४०) आणि तिच्या दोन मुली वय वर्षे सहा व पाच यांना कर्नाटकातील कुमटा तालुक्यातील रामतीर्था टेकड्यांवरील जंगलातून पोलिसांनी ११ जुलै रोजी वाचवले.

त्यांच्याकडे भारतात राहण्यासाठी वैध दस्तऐवज नव्हते. कर्नाटक उच्च न्यायालयाने २६ सप्टेंबर रोजी केंद्र सरकारला त्या तिघींना रशियात परत पाठविण्यासाठी प्रवास कागदपत्रे जारी करण्याचे निर्देश दिले. त्याविरोधात गोव्यातील इस्रायली व्यापारी ड्रोर श्लोमो गोल्डस्टीन यांनी याचिका दाखल केली होती.

न्यायालयाने विचारले, ‘तुम्ही कोण? तुमचा त्यांच्याशी काय संबंध? कुठे अधिकृत नोंद आहे का? की तुम्ही त्यांचे वडील आहात?’ न्यायालयाच्या निरीक्षणानंतर अखेरीस गोल्डस्टीन यांच्या वकिलांनी याचिका मागे घेतली.