Russian Arrested In Goa: खून प्रकरणात जामिनावर असलेल्या रशियन नागरिकाचा आणखी एक कांड, ड्रग्ज प्रकरणात मांद्रे पोलिसांकडून अटक

मांद्रे: रशियन महिलेच्या खून प्रकरणात जामिनावर असलेल्या रशियन नागरिकाला आता नव्या प्रकरणात अटक करण्यात आली आहे. अमली पदार्थ बाळगल्याप्रकरणी मांद्रे पोलिसांनी हरमल येथे उशीरा रात्री ही कारवाई केली. त्याच्याकडे ३.६५ लाख किंमतीचा चरस, एमडीएमए हा अमली पदार्थ आढळून आला आहे.

पोलिसांनी दिलेल्या माहितीनुसार, संशयित ५१ वर्षीय रशियन नागरिकाला मांद्रे पोलिसांनी अटक केली आहे. त्याच्याकडे ३०० ग्रॅम चरस, ६.४५ ग्रॅम एमडीएमए आणि मोबाईल फोन असा ३.६५ लाख किंमतीचा मुद्देमाल जप्त करण्यात आला आहे. पोलिसांना मिळालेल्या गुप्त माहितीच्या आधारे पोलिस निरीक्षक लक्ष्मण देसाई आणि त्यांच्या टीमने हरमल येथे ही कारवाई केली.

संशयित रशियन नागरिक २०१७ पासून हणजूण येथे वास्तव्यास आहे. रशियन महिलेच्या खून प्रकरणात त्याला २०२१ साली अटक करण्यात आली होती. सध्या तो जामिनावर बाहेर आहे. जामिनावर असताना देखील त्याची गुन्हेगारी कृत्ये कमी होताना दिसत नसून, तो किनारी भागात अमली पदार्थ विक्री करताना दिसून येत आहे.

संशयित रशियन नागरिकाला अटक करण्यात आली असून, त्याचा हणजूण, कळंगुट. हरमल आणि मांद्रे या किनारी भागात अमली पदार्थ तस्करीत सहभाग दिसून आला आहे. याप्रकरणी मांद्रे पोलिस अधिक तपास करत आहेत.