Pernem Crime: पेडण्यातील सातेरी मंदिराजवळ पोलिसांचं 'ऑपरेशन', रशियन नागरिकाला अटक

पेडणे: अमली पदार्थ गांजा जवळ बाळगल्याप्रकरणी गोवा पोलिसांनी रशियन नागरिकाला अटक केली आहे. बुधवारी (१४ ऑगस्ट) पेडणे तालुक्यातील सातेरी मंदिराजवळ ही कारवाई करण्यात आली.

पोलिसांनी दिलेल्या माहितीनुसार, अमली पदार्थ विरोधी पथक, पणजी गोवा यांच्या वतीने मराठावाडा, मांद्रे येथील सातेरी मंदिराजवळ छापा टाकला.

पथकाने ४२ वर्षीय रशियन नागरिक कोंस्टाटीन मार्जर्ली याला गांजा हा अमली पदार्थ जवळ बाळगल्याप्रकरणी अटक केली. त्याच्याकडे दोन प्रकारचे अमली पदार्थ आढळून आले. २९ व ५०० ग्रॅम वजनाचा एक लाख ६६ हजार किमतीचा गांजा पोलिसांनी जप्त केला आहे.

पोलिसांनी याप्रकरणी NDPS कायद्याअंतर्गत रशियन नागरिकाविरोधात गुन्हा नोंद केला आहे. संशयित रशियन नागरिक सध्या अटकेत असून, पोलिस निरीक्षक सुनील फालकर अधिक तपास करत आहेत.