मडगाव: दक्षिण गोव्यातील दोन विद्यार्थी युक्रेनमध्ये जिथे घमासान युद्ध चालू आहे तिथे अडकले असले तरी दोन विद्यार्थिनी काल सुखरूप घरी पोहोचल्याची माहिती दक्षिण गोवा जिल्हा प्रशासनाकडून मिळाली आहे. त्यात दवर्ली येथील रेशल गोम्स या विद्यार्थिनीचा समावेश आहे.
दक्षिण गोव्याचे (South Goa) अतिरिक्त जिल्हाधिकारी सुरेंद्र नाईक यांनी दिलेल्या माहितीनुसार दक्षिण गोव्यातील एकूण 12 विद्यार्थी युक्रेनमध्ये अडकले असून त्यापैकी दोघेजण काल गोव्यात पोहोचले. त्यात रेशल बरोबर कुडतरी येथील एका विद्यार्थिनीचा समावेश असल्याचे त्यांनी सांगितले.
काल आपल्या घरी पोहोचलेल्या रेशल गोम्स हिने प्रत्यक्ष युद्धाला सुरवात होण्यापूर्वीच म्हणजे 16 फेब्रुवारी रोजी आपल्या अन्य काही भारतीय विद्यार्थ्यांबरोबर युक्रेन सोडले होते. मात्र नंतर इतर सोपस्कार पूर्ण करायचे बाकी राहिल्याने त्यांना भारतात यायला उशीर झाला. शेवटी शारजाह मार्गाने ती काल गोव्यात पोहोचली.
रेशल गोम्स ही आपला वैद्यकीय अभ्यास पूर्ण करण्यासाठी युक्रेनला गेली होती. युक्रेनहुन गोव्यात पोहोचण्याच्या आपल्या प्रवासाबद्दल बोलताना ती म्हणाली, आम्ही प्रत्यक्ष युद्ध (Russia and Ukraine War) सुरू होण्यापूर्वी युक्रेन सोडले होते. त्यामुळे आम्हाला फारसे काही त्रास झाले नाहीत. मात्र युद्ध सुरू होणार अशा बातम्या त्याहीवेळी येऊन धडकत होत्या. त्यामुळे आमच्या उरात धडकी भरली होतीच, असे ती म्हणाली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
