रशिया-युक्रेन युद्ध आणि इस्रायल- हमास संघर्षाचा गोव्यात येणाऱ्या पर्यटक संख्येवर परिणाम - खंवटे

Russia-Ukraine, Israel-Hamas conflict: रशिया-युक्रेन युद्ध आणि पश्चिम आशियात सुरू असलेल्या इस्रायल हमासच्या संघर्षामुळे या देशांतून गोव्यात येणाऱ्या पर्यटकांचा ओघ कमी झाला आहे, असे राज्याचे पर्यटन मंत्री रोहन खंवटे यांनी म्हटले आहे.

गोव्यातीलच नव्हे तर देशातील पर्यटनाची दिशा बदलणाऱ्या नवनिर्मित पर्यटनाचे लोकार्पण गोवा पर्यटन खात्यातर्फे करण्यात आले, यावेळी खंवटे बोलत होते.

रशिया, युक्रेन आणि इस्रायल हे तीन देशातून गोव्यात मोठ्या प्रमाणात पर्यटक येत असतात, असे खंवटे म्हणाले.

सध्या या देशांत सुरु असलेल्या युद्ध आणि संघर्षाच्या पार्श्वभूमीवर गोव्यात नियमित येणाऱ्या पर्यटकांचा ओघ कमी झाला आहे, असे त्यांनी नमूद केले.

यामुळे निर्माण झालेल्या पर्यटक संख्येची पोकळी भरुन काढण्यासाठी आम्ही प्रयत्न करत आहे, हे विशद करताना खंवटे म्हणाले, "गेल्या वर्षभरात गोव्याला भेट देणाऱ्या पर्यटकांची संख्या बघितली तर ती मागील वर्षीच्या तुलनेत जास्त आहे. यावरून देशांतर्गत पर्यटकांची संख्या अधिक असल्याचे दिसून येते.

पण, आंतरराष्ट्रीय पर्यटक गोव्यात सरासरी आठ दिवस मुक्काम करतात, तर देशी पर्यटकांचा मुक्काम चार दिवस असतो, याकडे दुर्लक्ष करता येणार नाही, असे खंवटे म्हणाले.

गोवा सरकारने अलिकडे आनोख्या पर्यटन स्थळांना प्रोत्साहन दिल्याने, राज्यात येणाऱ्या पर्यटकांच्या संख्येत सातत्याने वाढ होण्याची अपेक्षा आहे,

सध्या राज्याच्या जीडीपीमध्ये पर्यटनाचा वाटा 16 टक्के आहे. येत्या तीन वर्षांत तो 20 ते 24 टक्क्यांपर्यंत वाढावा, अशी आमचा प्रयत्न असेल, असे खंवटे म्हणाले.