Colvale Jail: ‘कोलवाळ’मध्ये रोलिंग पेपर्स; जेलगार्ड निलंबित

Colvale Jail Drug Case: म्हापसा येथील कोलवाळ मध्यवर्ती कारागृहात आज जेलगार्डला रोलिंग पेपर्सची तस्करी करताना रंगेहाथ पकडण्यात आले. या प्रकरणी जेलगार्ड समीर मोटे याच्यावर निलंबनाची कारवाई करण्यात आली.

सूत्रांच्या माहितीनुसार, या रोलिंग पेपर्सचा वापर हा तंबाखू, चरस, गांजा आदी पदार्थ ओढण्यासाठी केला जातो. कारागृहात ड्युटीसाठी प्रवेश करण्याच्या तयारीत असताना सुरक्षेसाठी तैनात सुरक्षा रक्षकांनी मोटे याची तपासणी केली.

यात त्याच्याकडे रोलिंग पेपर्स आढळले. मोटे याच्यावर यापूर्वी अशाच एका प्रकरणात कारवाई झाली होती. कैद्यांना अंमलीपदार्थ तसेच मोबाईलचा पुरवठा केल्याच्या आरोप त्याच्यावर होता. त्यावेळी त्याला निलंबित केले होते. आता या जेलगार्डचे दुसऱ्यांदा निलंबन झाले आहे.

दरम्यान, कोलवाळ कारागृहात गत दहा दिवसांत दोन वेळेस छापा टाकून कैद्यांकडून एकूण तब्बल 35 मोबाईल संच, ब्लूटूथ, तंबाखू, सिगरेट्स तसेच अंमलीपदार्थ जप्त करण्यात आले होते. या सर्व प्रकारांमुळे येथील कारागृहाची सुरक्षा व्यवस्था दिवसेंदिवस ढासळत चालली आहे, हेच अधोरेखीत होते.