Panjim Carnival: पणजी कार्निव्हलचे रोहित मोन्सेरात अध्यक्ष

Panjim Carnival: पणजीत फेब्रुवारीमध्ये होणाऱ्या कार्निव्हल आयोजनासाठी महानगरपालिकेची गतवर्षी असणारी समिती कायम ठेवण्यात आली आहे. या समितीचे अध्यक्षपद महापौर रोहित मोन्सेरात यांच्याकडे असून, उपाध्यक्षपद आयुक्त क्लेन मेदेरा यांच्याकडे कायम आहे.

पर्यटन खात्याच्यावतीने मंत्री रोहन खंवटे यांनी राज्यात होणाऱ्या कार्निव्हल आणि शिगमोत्सव मिरवणुकांच्या तारखा नुकत्याच जाहीर केल्या होत्या. त्यातील पणजीतील कार्निव्हल मिरवणूक अर्थात ‘फ्लोट परेड’ 10 फेब्रुवारी रोजी होणार आहे. त्यानंतर चर्च परिसरातील गार्सिया गार्डनशेजारी निर्माण केल्या जाणाऱ्या सांबा स्क्वेअरमध्ये विविध कार्यक्रमांचे आयोजन केले जाते.

या सांबा स्क्वेअरमधील कार्यक्रमांसाठी महापालिकेच्यावतीने शुल्क आकारले जाते. पर्यटक आणि स्थानिकांसाठी येथील कार्यक्रम आकर्षण असतात. शिवाय तिथे उभारल्या जाणाऱ्या शितपेयांच्या, मद्यांच्या व खाद्यपदार्थ्यांच्या स्टॉलवर मध्यरात्रीपर्यंत गर्दी असते. स्टॉलधारकांना आकारल्या जाणाऱ्या भाडेपट्टीतून आणि तिकीट विक्रीतून महापालिकेला चांगला महसूल मिळतो.