मडगाव: खारेबांद येथील एका घरातील व्यक्ती चतुर्थीसाठी आपले घर बंद करुन दुसरीकडे गेल्‍याचा फायदा उठवत अज्ञात चोरट्यांनी आज (9 सप्टेंबर) पहाटे या घरावर डल्‍ला मारुन 3 लाखांचे दागिने आणि 1.80 लाखाची रोख असा एकंदर 4.80 लाखांचा ऐवज लंपास केला.
लंगव्‍वा जामुनी या महिलेच्‍या मालकीचे हे घर असून ही चोरी पहाटे 2 वाजल्‍यानंतर झाली असावी असा अंदाज व्‍यक्‍त करण्‍यात येत आहे. जामुनी यांनी दिलेल्‍या माहितीप्रमाणे, चतुर्थी असल्‍याने घरातील मंडळी घर बंद करुन दुसरीकडे गेली होती. घरातील कपाटात दागिने ठेवण्‍यात आले होते. तसेच काही रोख रक्‍कमही ठेवण्‍यात आली होती. अज्ञात चोरट्यांनी दर्शनी दरवाजाला लावलेले कुलूप तोडून घरात प्रवेश केला. त्‍यानंतर घरातील कपाट फोडून दागिने आणि अन्‍य रोख रक्‍कम पळवली. याच घरात रहाणारा लंगव्‍वा जामुनी हिचा भाचा सागर जामुनी हा सकाळी 5 वाजता आपल्‍या घराकडे आला असता त्‍याने आपल्‍या घरचा तोडलेला दरवाजा पाहिला.
घरात प्रवेश केला असता, कपाट फोडून सामान अत्‍यवस्‍थ पडलेले दिसले. त्‍यानंतर त्‍याने झालेल्‍या प्रक़ाराची खबर मडगाव पोलिसांना दिली. नंतर आपल्‍या मावशीलाही त्‍याची माहिती दिली. त्‍याच्‍या मावशीने सुमारे 50 हजाराची रोख घरात ठेवली होती. तर सागरने घर दुरुस्‍तीसाठी 1.30 लाख रुपये रोख घरात आणून ठेवली होती. हे सर्व पैसे चोरट्यांनी चोरुन नेले असे त्‍याने सांगितले.
आपण गणपती विसर्जन करुन रात्री 2 वाजण्‍याच्‍या सुमारास घराकडे आलो होतो त्‍यावेळी दरवाजा व्‍यवस्‍थित होता. नंतर आपण एकाला मोपा विमानतळावर सोडण्‍यासाठी गेलो. 5 वाजण्‍याच्‍या सुमारास परत आलो असता हा चोरीचा प्रकार आपल्‍या लक्षात आला अशी माहिती सागरने दिली. या प्रकरणात मडगाव पोलिसांनी अज्ञाताविरोधात गुन्‍हा नोंद केला असून पोलीस तपास करीत आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.