विश्वजीत राणेंना महत्त्वाच्या खात्यांची बक्षिसी

वाळपई: वाळपईचे आमदार तथा कॅबिनेट मंत्री विश्वजीत प्रतापसिंह राणे यांना महत्त्वाची पाच खाती बहाल केल्याने सत्तरी तालुक्यात जल्लोषाचे वातावरण असून लोक आनंदी झाले आहेत. विश्वजीतना मागीलवेळी आरोग्य, महिला आणि बाल विकास ही खाती दिली होती. यावेळी त्यात वाढ करीत वन खाते, नगरनियोजन, नगरविकास ही आणखी तीन अतिरिक्त खाती देण्यात आली आहेत. विश्‍वजीत यांच्या या प्रगतीच्या चढत्या आलेखाविषयी वाळपईच्या नगराध्यक्ष शेहझीन शेख म्हणाल्या, मंत्री विश्वजीत यांनी मागील पाच वर्षांत आरोग्य खात्यात आमूलाग्र बदल घडवून आणले. त्यामुळे त्यांना पुन्हा एकदा आरोग्य सेवेची जबाबदारी दिल्याने त्यांचे अभिनंदन आहे. त्यात आता त्यांना आणखी तीन अतिरिक्त खाती दिली आहेत.

त्यामुळे सत्तरीच्या विकासाला मोठी चालना मिळणार आहे. विशेष करून वाळपई पालिका क्षेत्रातील कामांना आणखी गती मिळणार आहे. वाळपईचे नगरसेवक रामदास शिरोडकर म्हणाले, विश्वजीत यांनी वाळपईचा कायापालट केला आहे. प्रत्येक प्रभागात विकासकामांना चालना दिली होती. आता पाच महत्त्वाची खाती मिळाल्याने वाळपईसह सत्तरीचा विकासरथ आणखी गतिमान होणार आहे.नगरगावचे पंच रामू खरवत म्हणाले, राणेंच्या मंत्रिपदामुळे विविध भागांत विशेष करून दुर्गम भागांत सोयीसुविधा पोहचल्या आहेत. नगरगाव पंचायत क्षेत्रात हॉटमिक्स रस्ते झाले आहेत. येत्या पाच वर्षांत आता सर्वांगीण विकासाला चालना मिळण्यास मोठा वाव मिळाला आहे.

वाळपईचे माजी नगराध्यक्ष अख्तर शहा म्हणाले, राणे यांनी कोविड महामारीवेळी मोठा संघर्षमय काळ पाहिला. त्या मोठ्या संकटातही राणे यांनी आरोग्य खात्याची जबाबदारी सक्षमपणे सांभाळत कोविड नियंत्रणात आणला. आता पुन्हा आरोग्य खात्याबरोबरच अन्य खात्यांचीही जबाबदारी ते सक्षमपणे पेलणार आहेत.