Revolutionary Goans : राज्य सरकारकडून गोमंतकीय युवकांची फसवणूक

पणजी : राज्‍य सरकार राज्‍यातील बेरोजगार युवकांची फसवणूक करत आहे. कौशल्य विकासाच्‍या नावाखाली सरकार युवकांना गंडवत असल्‍याचा आरोप रिव्‍होल्‍युशनरी गोवन्‍स पार्टीचे सर्वेसर्वा मनोज परब यांनी केला. पक्षाच्‍या येथील कार्यालयात घेतलेल्‍या पत्रकार परिषदेत ते बोलत होते. सरकारच्‍या अनेक कामांतील भानगडींची माहिती देण्यासाठी आम्‍ही पुढील काही दिवस दररोज पत्रकार परिषद घेऊन सरकारची पोलखोल करणार असल्‍याचे परब यांनी यावेळी सांगितले.

नुकत्‍याच झालेल्‍या विधानसभा अधिवेशनात सरकारने लोकहिताचे अनेक प्रश्‍न चर्चेला येऊ दिले नाहीत. तसेच सरकार कौशल्‍य विकास उपक्रमाद्वारे राज्‍यातील बेरोजगारी कमी करणार असल्‍याचे सांगत आहे, पण कौशल्य विकास करण्यासाठी आवश्‍यक असलेली कोणतीही नवीन यंत्रणा गेल्‍या दहा वर्षांत सरकारने उभारलेली नाही, असा आरोप परब यांनी केला.

केंद्रात आणि राज्‍यात भाजपाचे सरकार सत्तेत आहे. मुख्यमंत्री आमचे डबल इंजिनचे सरकार म्‍हणून सर्वत्र ढोल पीटत आहेत. प्रत्‍यक्षात हे डबल इंजिन काही कामाचे नाही. कारण युवकांच्‍या कौशल्य विकासाकडे ना केंद्राचे लक्ष आहे ना राज्‍य सरकार गंभीर आहे. कारण सरकारने दिलेल्‍या माहितीनुसार कौशल्‍य विकास कार्यक्रमासाठी केंद्र सरकारकडून 56 कोटी रुपयांची तरतूद करण्यात आली आहे. प्रत्‍यक्षात केंद्राने केवळ 10 कोटी रुपये राज्‍याला दिले, असे ते म्‍हणाले.