Goa Assembly Monsoon Session 2024: आपत्ती व्यवस्थापनासाठी निधीच नाही; महसूलमंत्री ‌मोन्सेरात

मुरगावचे आमदार संकल्प आमोणकर यांनी शुक्रवारी विधानसभेत प्रश्नोत्तर तासाला नैसर्गिक आपत्तीमुळे झालेले नुकसान भरून देण्यासाठी आणि आपत्ती येऊ नये, यासाठी करावयाच्या उपाययोजनांसंदर्भात प्रश्न उपस्थित केला होता.

त्याला उत्तर देताना महसूलमंत्री ‌बाबूश मोन्सेरात यांनी आपत्ती व्यवस्थापनासाठी वेगळा निधी सरकारकडून दिला जात नसल्याची कबुली दिली. ते म्हणाले, आपत्ती व्यवस्थापन समितीमध्ये सार्वजनिक बांधकाम, जलसंपदा अशी खाती आहेत. त्या खात्यांच्या माध्यमातून आपत्ती व्यवस्थापन यंत्रणा काम करवून घेते.

घर पडलेल्यांना दोन लाखांची मदत

फातोर्ड्याचे आमदार विजय सरदेसाई यांनी, राज्यभरात पावसामुळे पडझड झालेली नुकसानग्रस्त सर्वच घरे सरकार बांधून देणार का, अशी विचारणा केली. त्यावर मुख्यमंत्री डॉ. प्रमोद सावंत यांनी, अटल आसरा योजनेंअतर्गत दोन लाख रुपयांची मदत प्रत्येक नुकसानग्रस्त घराला देऊ, अशी घोषणा केली.