'Cash For Job Scam'चे आणखी एक प्रकरण उघड! निवृत्त नौदल कर्मचाऱ्याच्या मुलाकडून 6 लाख उकळले

Tiswadi Cash For Job Scam

तिसवाडी: पैसे घेऊन नोकरी देण्याचे प्रकरण सध्या राज्यात गाजत असताना तिसवाडीत आणखी एक प्रकरण उघडकीस आले आहे. निवृत्त नौदल कर्मचाऱ्याच्या मुलाला अबकारी खात्यात उपनिरीक्षकपदी नोकरी देण्याचे आमिष दाखवून ६ लाख रुपयांची फसवणूक केल्याची माहिती जुने गोवे पोलिसांनी दिली आहे. याप्रकरणी सतीश मोरे याच्यासह सरिता केरकर यांच्याविरोधात गुन्हा दाखल केला आहे.

पोलिसांनी दिलेल्या माहितीनुसार मेरशी येथे राहणाऱ्या एका महिलेने फसवणूक झाल्याची तक्रार दाखल होती. आपल्या मुलाला अबकारी खात्यात उपनिरीक्षकाची नोकरी देण्याचे आमिष दाखवून संशयित शिवा मोरे आणि सरिता केरकर या दोघांनी मार्च २०२३ ते १४ ऑक्टोबर २०२४ दरम्यान ६ लाख रुपये घेतले होते, तसेच संशयितांनी अबकारी खात्याचे अधिकारी संकेत साखरदांडे यांच्या नावे बनावट दस्तावेज तयार केला होता, असे महिलेने आपल्या तक्रारीत म्हटले आहे. अजूनही अनेक प्रकरणे उघड होण्याची शक्यता पोलिसांनी व्यक्त केली आहे.

संशयितांचा अटकपूर्व जामिनासाठी अर्ज

तुमचा मुलगा अंतिम यादी समाविष्ट असल्याचे भासवून संशयितांनी दस्तावेज महिलेला दिले होते. आपली फसवणूक झाल्याचे समोर आल्यानंतर तिने जुने गोवे पोलिस ठाण्यात तक्रार दाखल केली. दरम्यान, दोन्ही संशयितांनी पणजी येथील उत्तर गोवा जिल्हा व सत्र न्यायालयात धाव घेऊन अटकपूर्व जामीन अर्ज दाखल केला आहे.