Margao News: घराचे बांधकाम कुणीही रोखलेले नाही; नगरसेवक आमोणकर

निवृत्त हाेमगार्ड विमल शिरोडकर हिच्‍या घराची दुरुस्‍ती मामलेदार कार्यालयातील कर्मचाऱ्यांनी बंद पाडली, असा जो आरोप केला जात आहे, त्‍यात तथ्‍य नाही. शिरोडकरच्‍या घराची आणखी एक भिंत कोसळण्‍याची शक्‍यता आहे. त्‍यामुळे अशा स्‍थितीत सुरक्षेचे उपाय न घेता कुठलेही काम हाती घेतल्‍यास घराची पूर्णत: पडझड होऊ शकते, ही भीती लक्षात ठेवूनच सासष्टीचे मामलेदार प्रताप गावकर यांनी कुठलेही काम करू नका, अशा सूचना केल्‍या होत्‍या, अशी माहिती या भागाचे नगरसेवक महेश आमोणकर यांनी दिली.

या घराच्‍या मुद्यावरून काहीजण मुद्दाम राजकारण करू पहात आहेत, असा आरोप त्‍यांनी केला. स्‍थानिक आमदार दिगंबर कामत यांचे नाव बदनाम करण्‍यासाठी काहीजण मुद्दाम अशा वावड्या पसरवितात. शिरोडकर हिचे घर कोसळल्‍याचे समजल्‍यावर सर्वांत प्रथम आपण आणि आमदार दिगंबर कामत हेच तिथे धावून आले होते. शिरोडकर यांना पक्‍के घर बांधून देण्‍यासाठी आमचे प्रयत्‍न चालू आहेत, अशी माहिती आमोणकर यांनी दिली.

दरम्‍यान, खारेबांद या भागात आणखी एका मातीच्‍या घराची पावसामुळे पडझड झाली, अशी माहिती आमोणकर यांनी दिली. या घराची पहाणी करून त्‍याही घरमालकाला नुकसान भरपाई मिळावी यासाठी प्रयत्‍न चालू आहेत, असे त्‍यांनी सांगितले.