Bicholim News : 50 मेगावॅट वीजनिर्मितीचा संकल्प

Bicholim News : वीज क्षेत्रात गोवा राज्य स्वयंपूर्ण बनविणे हा उद्देश आहे. विजेसाठी अन्य राज्यांवर अवलंबून न राहता वीज निर्मितीबाबत स्वतंत्र बनणे, हे राज्य सरकारचे धोरण आहे. त्या अनुषंगाने पुढील तीन वर्षांत राज्यात १५० मेगावॅट वीजनिर्मिती करण्यात येणार असल्याची माहिती वीजमंत्री सुदिन ढवळीकर यांनी दिली.

शिरगाव येथे ११ कोटी रुपयांच्या भूमिगत एचटी आणि एलटी वीज केबल टाकण्याच्या कामाचा पायाभरणी सोहळा आज रविवारी संपन्न झाला. यावेळी ते बोलत होते. श्री लईराई देवस्थान सभागृहात आयोजित सोहळ्याप्रसंगी मयेचे आमदार प्रेमेंद्र शेट, वीज खात्याचे मुख्य अभियंते स्टिफन फर्नांडिस, कार्यकारी रामचंद्र मुद्रास, जिल्हा पंचायत सदस्य महेश सावंत, शिरगावच्या सरपंच करिश्मा गावकर, उपसरपंच जयंत गावकर, श्री लईराई देवस्थानचे अध्यक्ष गणेश गावकर आदी उपस्थित होते.

४२ कोटींची कामे मंजूर

वीज खात्यातर्फे मये मतदारसंघात ४२ कोटी खर्चाच्या कामांना मंजुरी मिळाली आहे, अशी माहिती आमदार प्रेमेंद्र शेट यांनी दिली. शिरगाव येथील भूमिगत केबलचे काम श्री लईराई देवीच्या जत्रेपूर्वी पूर्ण करण्यात येणार असल्याचेही त्यांनी सांगितले. विजेच्या बाबतीत राज्य स्वयंपूर्ण बनण्यासाठी मंत्र्यांच्या सहकार्याने प्रयत्न चालू आहेत. विकासकामांसाठी जनतेने सहकार्य करावे, असे आवाहन फर्नांडिस यांनी केले.

नागरिकांना चांगल्या साधनसुविधा उपलब्ध करून देणे, हे सरकारचे कर्तव्य आहे. शाळा, सरकारी इमारती आणि धार्मिक स्थळांवर सोलर बसवून वीज निर्मिती करण्यात येईल. गेल्या एक वर्षात वीज खात्यातर्फे १ हजार ३०० कोटी रुपयांच्या कामांना चालना देण्यात आली आहे.

सुदिन ढवळीकर, वीजमंत्री