कोडार येथे आता कृषी महाविद्यालय होणार

फोंडा : राज्यात प्रथमच कृषी महाविद्यालय साकारणार असून यंदापासूनच अभ्यासक्रमाला सुरवात होणार आहे. फोंड्यातील कोडार - बेतोडा येथे कृषी खात्याच्या वास्तूत हे कृषी महाविद्यालय सुरू करण्यात येणार आहे. कोडार येथील कृषी खात्याच्या विस्तीर्ण जागेचा वापर या कृषी महाविद्यालयासाठी करण्यात येणार असल्याची माहिती राज्याचे माजी मुख्यमंत्री तथा विद्यमान कृषीमंत्री रवी नाईक यांनी दिली.

कोडार येथील या कृषी महाविद्यालयात कृषीविषयक पदवी अभ्यासक्रम सुरू करण्यात येत आहे. विज्ञान शाखेतील बारावी उत्तीर्ण विद्यार्थ्यांना या कृषीविषयक पदवी अभ्यासक्रमासाठी प्रवेश दिला जाणार आहे. साधारण चाळीस विद्यार्थ्यांची तुकडी या पदवी अभ्यासक्रमाचा लाभ घेऊ शकेल, असेही रवी नाईक म्हणाले.

कृषीविषयक समितीतर्फे हा प्रस्ताव चालीस लावण्यात आला आहे. सरकारच्या या कृषी समितीने राज्यात पहिलेच कृषी महाविद्यालय उभारण्यासाठी सहकार्य केले असल्याने यंदापासूनच पहिल्या अभ्यासक्रमाला सुरुवात होणार असल्याचे रवी नाईक यांनी सांगितले.

कृषीधनाला देणार प्रोत्साहन

राज्यातील कृषी लागवड वाढवण्याबरोबरच कृषी व्यवसायातून आत्मनिर्भर भारत व स्वयंपूर्ण गोव्याच्या निर्मितीला या कृषी लागवडीतून प्रोत्साहन मिळणार असल्याची माहिती कृषीमंत्री रवी नाईक यांनी दिली. आपापल्या शेतीत विविध कृषी लागवड करण्यासाठी सरकारच्या विविध योजनांचा लाभ घेण्यासाठी शेतकऱ्यांना प्रोत्साहन देण्यात येत असून कृषी खात्याच्या या योजनाही क्लिष्ट न होता, सुटसुटीत आणि सोप्या कशा होतील, याकडे कटाक्ष ठेवण्यात आला आहे. कृषी खात्याच्या विविध योजनांचा लाभ घेण्यासाठी कृषी कार्डची आवश्‍यकता लागत असल्याने हे कृषी कार्ड करण्यासाठी खडपाबांध - फोंड्यात कृषीमंत्री रवी नाईक यांच्या कार्यालयातही संबंधित शेतकऱ्यांना मार्गदर्शन व सहकार्य करण्यात येत असल्याचेही यावेळी सांगण्यात आले.

सध्याचे कृषी अभ्यासक्रम

महाराष्ट्रातील कोकणामध्ये दापोली - रत्नागिरी येथे कृषी महाविद्यालय असून गोव्यात सावईवेरे येथे रायकर कृषी विद्यालयातर्फे दोन वर्षांचा पदविका अभ्यासक्रम सध्या शिकवला जातो. सावईवेरे येथील या कृषी अभ्यासक्रमाला विद्यार्थ्यांचा चांगला प्रतिसाद असून पदवी अभ्यासक्रमासाठी कोडार-फोंड्यात आता नव्याने सुविधा उपलब्ध होणार आहे.