ST Reservation: रामदास आठवलेंच्या 'त्या' व्यक्तव्याचे खापर कार्यकर्त्यांवर; सतीश कोरगावकरांचा खुलासा

Ramdas Athawale Statement on ST Reservation

काल (मंगळवार) केंद्रीय सामाजिक न्यायमंत्री रामदास आठवले यांनी गोव्यातील एसटी समाजाच्या आरक्षणबाबत वादग्रस्त वक्तव्य केल्यानंतर राज्यात खळबळ माजली. यावर नंतर आठवले यांनी खुलासा करत माफीदेखील मागितली.

रिपब्लिक पार्टी ऑफ इंडिया गोवा प्रदेशचे अध्यक्ष सतीश कोरगावकर यांनी खुलासा केला आहे. ते म्हणाले की, आठवले यांनी हे विधान रिपब्लिक पार्टी ऑफ इंडियाच्या कार्यकर्त्यांनी त्यांना चुकीची माहिती पुरविल्याने केले.

त्यामुळे याची नैतिक जबाबदारी अध्यक्ष या नात्याने आपण स्वीकारत असल्याचे त्यांनी सांगितले. त्यांनी एसटी समाजातील बांधव किंवा इतर नेत्यांनी गैरसमज करून घेऊ नये असे आवाहन केले.

दरम्यान, यावरून विजय सरदेसाई यांनी मंत्री रामदास आठवले यांच्यावरही निशाणा साधला आहे. गोव्‍यात एसटी समाजाची लोकसंख्‍या कमी असल्‍याने विधानसभेत त्‍यांना आरक्षण मिळणे अशक्‍य, असे वक्‍तव्‍य करून नंतर केंद्रीय सामाजिक न्‍यायमंत्री रामदास आठवले यांनी काेलांटी मारली.

त्यावर सरदेसाई यांनी तीव्र प्रतिक्रिया व्‍यक्‍त करताना आठवले हे सामाजिक न्‍यायमंत्री की अन्‍यायमंत्री, असा सवाल केला.