Goa Accident News : भरधाव वाहनाची धडक; अभियंता जखमी

जलवाहिनी फुटल्याने सध्या माडेल-थिवी येथे महामार्गावर साबांखाच्या अधिकाऱ्यांकडून दुरुस्ती सध्या युद्धपातळीवर सुरू आहे. हे काम पूर्ण होण्यास गुरुवार मध्यरात्रीपर्यंत वेळ लागू शकतो.

त्यामुळे बार्देशात शुक्रवारपर्यंत मर्यादित पाणीपुरवठा असेल, असे अधिकाऱ्यांनी सांगितले. अशातच, बुधवारी सायं. 7.30 वा.च्या सुमारास एका भरधाव टाटा एसने घटनास्थळी बॅरिकेड्सला धडक दिली. यात कनिष्ठ अभियंता तनय कांदोळकर यांना टाटा एसची धडक बसल्याने ते गंभीर जखमी झाले.

एका ट्रकला ओव्हरटेक करण्याच्या नादात टाटा एसचा हा अपघात घडला. बॅरिकेड्स असल्याने ही टाटा एस स्थिरावली. अन्यथा ती खड्ड्यात कोसळली असती.

जखमी अभियंत्याला जिल्हा इस्पितळात हलविले असून ते डॉक्टरांच्या देखरेखीत आहेत. तिथे असलेले इतर अधिकारी व कर्मचारी बचावले. कोलवाळ पोलिसांनी संशयितास ताब्यात घेतले.