Pune - Goa Flight: गोवा ख्रिसमसचा प्लॅन फिसकटला; पुण्यातून जाणाऱ्या फ्लाईटला नऊ तासांचा विलंब

Pune - Goa Flight Delay

पुणे: पुण्यातून गोव्याला जाणाऱ्या फ्लाईटने तब्बल नऊ तास विलंबाने उड्डाण केल्याने १०० पर्यटक आणि प्रवशांचा खोळंबा झाला. फ्लाईटने अनेकजण नाताळसाठी गोव्यात जात होते. दरम्यान, दुपारी जाणाऱ्या फ्लाईटने रात्री उशीरा उड्डाण केल्याने पर्यटकांचा गोव्यातील नाताळ प्लॅन फिसकटला.

स्पाईसजेट कंपनीची SG-185 फ्लाईट बुधवारी सकाळी साडे अकरा वाजता पुण्यातून गोव्यासाठी उड्डाण घेणार होती. जवळपास एक तास अगोदरच प्रवासी विमानतळावर दाखल झाले.

पण, प्रवाशांना फ्लाईट सुरुवातीला साडे बारा वाजता, नंतर दीड वाजता आणि त्यानंतर रात्री साडे सात वाजता उड्डाण करेल, अशी माहिती देण्यात आली. अखेर या फ्लाईटने रात्री सव्वा नऊ वाजता गोव्यासाठी उड्डाण केले. फ्लाईटला नऊ तास उशीर झाल्याने प्रवाशांनी संताप व्यक्त केला.

विमान उड्डाणाला नऊ तासांचा विलंब झाल्याने नाताळच्या निमित्ताने गोव्यात जाणाऱ्या प्रवाशांच्या पदरी निराशा आली. विमान कंपनीकडून प्रवाशांना योग्य वेळी माहिती दिली नाही तसेच, पर्यायी प्रवासाची व्यवस्था केली नाही म्हणून त्यांनी विमानतळावर गोंधळ घातला.

सुरुवातीला विमानातील स्टाफ उपलब्ध नसल्याने विलंब होत असल्याचे कारण देण्यात आले. त्यानंतर तांत्रिक अडचणीचे कारण देऊन विलंब करण्यात आला. अखेर नऊ तासांनी विमानाने उड्डाण घेतले. तोपर्यंत प्रवाशांना विमानतळावर ताटकळत थांबावे लागले.