मुंबई- गोवा महामार्गावरील परशुराम घाटात संरक्षक भिंत कोसळली असून, सध्या या मार्गावर एकेरी वाहतूक सुरु ठेवण्यात आली आहे. संरक्षक भिंत कोसळल्याने मुख्य रस्त्याला देखील धोका निर्माण झाला आहे. रत्नागिरी जिल्ह्यात गेल्या दोन दिवसांपासून सुरु असलेल्या सततच्या पावसामुळे रस्ता खचल्याचे सांगितले जात आहे.
मिळालेल्या माहितीनुसार, रत्नागिरी जिल्ह्यात गेल्या काही दिवसांपासून मुसळधार पाऊस सुरु आहे. खेड तालुक्यातील जगबुडी नदीने देखील धोक्याची पातळी ओलांडली असून, ती सध्या 5.25 मीटर एवढी झाली आहे.
तर, परशुराम घाटातील सुमारे दीड किलोमीटर लांब असणारी संरक्षक भिंत कोसळल्याने मुंबई-गोवा मुख्य महामार्गाला धोका निर्माण झाला आहे. खबरदारीचा उपाय म्हणून मार्गावर सध्या एकेरी वाहतूक सुरु ठेवण्यात आली आहे.
या मार्गावरुन प्रवास करणाऱ्या प्रवाशांना काळजीपूर्वक प्रवास करण्याचे आवाहन करण्यात आले आहे.
दरम्यान, गेल्या काही दिवसांपासून गोव्यासह कोकणात मुसळधार पावसाची नोंद होत आहे. सिंधुदुर्ग आणि रत्नागिरीत कोसळणाऱ्या मुसळधार पावसामुळे अनेक ठिकाणी पडझडीच्या घटना समोर येत आहेत.
पावसाळ्यात वर्षा पर्यटनासाठी कोकणात जाणाऱ्यांची संख्या अधिक असते. याच काळात अनेक नैसर्गिक दुर्घटना देखील घडत असतात. त्यामुळे पर्यटकांना याकाळात योग्य ती काळजी घेण्याचे आवाहन करण्यात आले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.