Goa Ganesha Festival: बाप्पालाही यंदा महागाईची झळ

Goa Ganesha Festival: गणेश चतुर्थीला आता महिनाभर बाकी राहिल्याने लगबग वाढली आहे. चित्रशाळांत गणेशमूर्तींचे आगमन झाले आहे. परंतु वाढत्या महागाईची झळ यंदा बाप्पालाही बसणार असून मूर्तींच्या किमतीत जबर वाढ होण्याची शक्यता आहे. दरम्यान, सरकारने अनुदान वाढवून द्यावे, अशी मागणी मूर्तिकारांकडून होत आहे.

काही चित्रशाळेत गणेशमूर्तींचे रंगकाम जोरात सुरू असल्याचे दिसून येते. दिवसरात्र कलाकार कामात मग्न असलेले दिसतात. परंतु महागाईमुळे यंदा गणेश मूर्तीच्या किंमतीत वाढ होण्याची शक्यता या कलाकारांकडून व्यक्त होत आहे.

82 वर्षांचे मडगावमधील एक प्रसिद्ध कलाकार तुळशीदास नाईक यांनी सांगितले की, माती, रंग तसेच कामगारांची मजुरी वाढल्याने मूर्तीच्या किमतीत वाढ केल्याशिवाय यंदा पर्याय नाही. मातीची 40 किलो पिशवी 600 रुपये मिळते, शिवाय रंगाच्या किमती वाढलेल्या आहेत. त्यामुळे यंदा गणपती दोन ते तीन हजार रुपयांना विकावा लागणार आहे.

प्रत्येक मूर्तीमागे १०० रुपये अनुदान सरकारकडून मिळते, त्यात वाढ होणे आवश्‍यक आहे. सरकारने याबाबत निर्णय घ्यावा, असे नाईक यांनी सांगितले.

दरम्यान गणेश मूर्तींच्या किमती वाढत असल्यामुळे लहान मूर्तींना मागणी वाढल्याचे चित्र राज्यात सर्वत्र दिसत आहे.

अनुदानात वाढ हवी

मडगावमधील आणखी एक चित्रकार सूर्यकांत विठ्ठल शेट प्रियोळकर यांनी सांगितले की, आम्ही एक फूट उंचीच्या मूर्तीला १००० रुपये तर दीड फूट उंचीच्या मूर्तीला १३०० रुपये घेतो. सरकारने अनुदान वाढवणे आवश्यक आहे, असे त्याने सांगितले. सूर्यकांतचे वडील विठ्ठल प्रियोळकर फोंड्याहून मडगावी स्थायिक झाल्यास ७५ वर्षे झाली. आता सूर्यकांतच गणेश मूर्ती करण्यास लागल्यास ५० वर्षे झाली, असे ते सांगतात.