साळगाव कचरा प्रकल्पातून तीव्र दुर्गंधी: प्रेमानंद दिवकर

कळंगुट: साळगांव येथील कचरा प्रक्रिया प्रकल्पातून गेल्या अनेक दिवसांपासून दुर्गंधी पसरल्याच्या स्थानिकांच्या तक्रारी आहेत. त्या तक्रारींची दखल घेऊन शुक्रवारी संध्याकाळी कळंगुट फोरमकडून येथील प्रकल्पाची पाहणी करण्यात आली. या पाहणीवेळी प्रकल्पात होत असलेल्या कचरा प्रक्रियेतून परिसरात दुर्गंधी पसरत असल्याचा प्रत्यक्ष अनुभव आल्याचे कळंगुट फोरमचे अध्यक्ष प्रेमानंद दिवकर यांनी सांगितले.

याआधी ही समस्या क्वचितच जाणवत होती, परंतु सध्या या प्रकल्पातून मोठ्या प्रमाणात आसपासच्या पिळर्ण पासून ते साळगाव, कांदोळीत दुर्गंधी पसरल्याचे दिवकर म्हणाले.

दरम्यान, यासंदर्भात फोरमकडून कचरा व्यवस्थापन मंत्री बाबुश मोन्सेरात तसेच साळगाव येथील प्रकल्प व्यवस्थापक कार्यालयात लेखी तक्रारी नोंदविण्यात आल्याचे दीवकर यांनी सांगितले. याआधी येथील कचरा व्यवस्थापन प्रकल्पाची ज्या पद्धतीने निगा राखली जायची, तशीच विद्यमान सरकारकडून राखली जावी, अशी मागणी फोरमचे अध्यक्ष प्रेमानंद दिवकर यांनी केली आहे. यावेळी त्यांच्यासमवेत फोरमचे क्लोटीड्स ब्रागांझा, क्रुझ सिल्वेरा, केविन सिल्वेरा, पर्पेच्युओ फर्नांडिस, तसेच ज्यो डिसौझा उपस्थित होते.