Mumbai Goa Highway: खड्डेमय मुंबई-गोवा महामार्ग अन् गर्भवती महिलेला बसमध्येच सुरु झाल्या प्रसूती वेदना...

Mumbai Goa Highway: खड्डेमय मुंबई-गोवा महामार्गाची अवस्था दयनीय आहे. सध्या या महामार्गाचे काम वेगाने सुरु आहे.

पण, मुंबई-गोवा महामार्गावर रायगड येथे महाराष्ट्र राज्य परिवहन महामंडळाच्या (MSRTC) बसमध्ये गर्भवती महिलेला प्रसूती वेदना झाल्या आणि बसच्या चालकाने दाखवलेल्या प्रसंगावधानामुळे महिलेची सुखरुप प्रसुती झाली. शनिवारी (दि.09) रायगडमधील कोलाड गावाजवळ घडली.

गर्भवती महिलेला बसमध्ये प्रसूती वेदना सुरु झाल्यानंतर बस चालकांनी तिला सुरक्षितपणे प्राथमिक आरोग्य केंद्रात दाखल केले. मुंबई-गोवा महामार्गावरील खड्डे दुरुस्तीचे काम सुरु आहे त्याच भागात ही घटना घडली.

आगामी गणेशोत्सवाच्या पार्श्वभूमीवर उत्सव संपेपर्यंत या मार्गावरून अवजड वाहनांच्या वाहतुकीस वाहतूक पोलिसांनी बंदी घातली आहे.

रुद्रोली गावात राहणाऱ्या सुशीला रवी पवार या दुपारी वडखळ येथे पनवेल-महाड बसमध्ये बसल्या. प्रवासादरम्यान त्यांना तीव्र प्रसूती वेदना जाणवू लागल्या, त्यामुळे सहप्रवासी आणि बसमधील कर्मचाऱ्यांमध्ये तात्काळ त्यांची विचारपूस करुन, रुग्णालयात दाखल करण्याची गरज व्यक्त केली.

बसचालक देविदास जाधव आणि वाहक भगवान परब यांनी प्रसंगावधान दाखवत बस कोलाड येथील आंबेवाडी प्राथमिक आरोग्य केंद्राकडे वळवली.

सुशीला यांना प्राथमिक आरोग्य केंद्रात वेळेवर वैद्यकीय उपचार मिळाले आणि त्यांनी गोंडस बाळाला जन्म दिला. सुशीला यांनी बसचालक आणि वाहक या दोघांचे आभार मानले आहेत.

आरोग्य केंद्रात पोहोचल्यानंतर आई आणि बाळ दोघांनाही आवश्यक वैद्यकीय सेवा मिळाली.

विशेष म्हणजे मुंबई-गोवा महामार्गावर खड्डे दुरुस्तीचे काम सुरू असून, आगामी गणेशोत्सव संपेपर्यंत या रस्त्यावरून अवजड वाहनांच्या वाहतुकीस वाहतूक पोलिसांनी बंदी घातली आहे.