Pooja Naik: 'हा तर सरकारला बदनाम करण्याचा प्रयत्न...' पूजा नाईकच्या आरोपांवर काय म्हणाले आमदार मायकल लोबो?

Goa Cash For Job Scam: 'कॅश फॉर जॉब' प्रकरणी आरोपी पूजा नाईक सातत्याने नव-नवे खुलासे करत आहे. नुकत्याच केलेल्या खुलाशात तिने थेट राज्याचे वीजमंत्री सुदिन ढवळीकर यांच्यासह काही अधिकाऱ्यांची नावे घेऊन गंभीर आरोप केले. यातच आता, पूजाकडून करण्यात आरोपांवर प्रतिक्रिया देताना आमदार मायकल लोबो यांनी हे आरोप गोव्यातील लोकांसाठी अविश्वसनीय असल्याचे म्हटले. तसेच, या आरोपांमागे सरकारला बदनाम करण्याचा प्रयत्न असण्याची शक्यताही त्यांनी व्यक्त केली.

आरोपांवर लोबोंची प्रतिक्रिया

आमदार लोबो म्हणाले, "अनेक महिने उलटून गेल्यानंतर आता पूजा नाईकने एक नवीन कहाणी समोर आणली आहे. ही कहाणी अनेक गोवेकरांना खरी वाटेल, यावर माझा विश्वास नाही."

लोबो यांनी पूजाला तिच्या आरोपांसंदर्भात पुरावे सादर करण्याचे आवाहन केले. लोबो म्हणाले, "पूजाने जे काही आरोप केले आणि ज्यांची नावे घेतली त्या सर्व आरोपांचे तिने पुरावे सादर करावेत. पुराव्याशिवाय केलेले आरोप गंभीर मानले जाऊ शकत नाहीत''

सरकारला बदनाम करण्याचा प्रयत्न?

तसेच, या आरोपांमागे कोणाचा हात आहे किंवा काय उद्देश आहे याबद्दल लोबो यांनी शंका व्यक्त केली. लोबो म्हणाले, "कोणीतरी जाणीवपूर्वक सरकारला बदनाम करण्याचा प्रयत्न करत असावा." नोकरी घोटाळ्यावरुन होणारे आरोप-प्रत्यारोप पाहता यामागे काही राजकीय हेतू असू शकतो का, अशी चर्चा राजकीय वर्तुळात सुरु आहे. लोबो यांच्या वक्तव्याने या चर्चेला अधिक जोर मिळाला आहे.

तपासावर विश्वास

या प्रकरणाच्या तपासावर आपण विश्वास ठेवत असल्याचे आमदार लोबो यांनी सांगितले. ते म्हणाले, "आता या प्रकरणात एफआयआर दाखल करण्यात आला आहे. त्यामुळे तपास यंत्रणांनी त्यांचे काम सुरु ठेवावे."

लोबो यांनी अशी आशा व्यक्त केली की, पोलीस तपासातून या प्रकरणातील सत्य आणि आरोपी पूजा नाईकच्या आरोपांमागील सत्यता लवकरच समोर येईल. त्यांनी गोव्यातील जनतेलाही अशा अविश्वसनीय कथांवर लगेच विश्वास न ठेवण्याचे आवाहन केले.