Ponda: फोंड्यात केबलच्या तुटक प्रक्षेपणाला लोक वैतागले; तक्रारी देऊनही 'येरे माझ्या मागल्या'

Ponda: सध्या फोंड्यात केबलच्या प्रक्षेपणात वारंवार खंड पडत असल्यामुळे केबल ग्राहक त्रस्त झाले आहेत. अनेक तक्रारी देऊन सुद्धा काहीच उपयोग होत नसल्याने लोक वैतागले आहेत. हवे तेवढे चॅनल्स घेण्याची मुभा असली तरी जे चॅनेल्स घेतात तेही सारखे बघायला मिळत नसल्याने लोकांमध्ये नाराजी पसरली आहे.

एखादा आवडीचा कार्यक्रम बघायला बसले की मध्येच ‘बॅड ऑर नो सिग्नल कॉन्टॅक्ट केबल ऑपरेटर’ असा संदेश येतो. मग कधी कधी तुटक तुटक प्रक्षेपण तर कधी प्रक्षेपणच गायब असा प्रकार वारंवार येतो. संपर्क साधल्यास मेकॅनिक येतो खरा; पण तो गेल्यावर परत ‘येरे माझ्या मागल्या’चा प्रत्यय येतो.

गेले आठ दिवस असे वारंवार घडत असून याबाबत केबल ग्राहकांना कोणच वाली नसल्याचे दिसत आहे. महिन्याचे पैसे देण्यास एक दिवस जरी उशीर झाला तरी लगेच सेवा बंद करण्यात येते. आता पैसे भरूनही जर अशी सेवा मिळत असेल तर ती सेवा काय कामाची असे लोक बोलताना दिसतात.

सध्या केबल सेवेला डिश अँटेनाचा पर्याय उपलब्ध आहे. पण त्या सेवेत स्थानिक वाहिन्या मिळत नसल्यामुळे ग्राहक केबल सेवेला प्राधान्य देतात; पण आता या सेवेला वैतागलेल्या ग्राहकांना केबलला राम राम ठोकण्याशिवाय दुसरा पर्याय नसल्याचे दिसायला लागले आहे.

याबाबत या सेवेच्या व्यवस्थापनाशी लोकांचे खटके उडतानाही दिसायला लागले आहेत. काही ग्राहकांनी परिस्थिती न सुधारल्यास केबल सेवेच्या कार्यालयावर मोर्चा नेऊन व्यवस्थापनाला घेराओ घालण्याची तयारी सुरू केली आहे. खरं तर आता केबल सेवेची ‘डिश’सोबत जोरदार स्पर्धा असल्यामुळे केबल सेवेने आपला दर्जा वाढवायला हवा होता.

पण काळाची पावले न ओळखता येत असल्यामुळे ही सेवा अजूनही ‘जुन्या जमान्यात’ असल्यासारखी वाटते. ग्राहकांच्या सहनशक्तीचा आणखी अंत न पाहता ही सेवा विनाखंडित व दर्जेदार द्यावी, अशी मागणी फोंड्यातील केबल ग्राहकांकडून केली जात आहे.

सेवेत सुधारणा व्हायला हवी- पारकर

सध्याची फोंड्यातील केबल सेवा ही दर्जाहीन झाल्यासारखी वाटते. स्थानिक वाहिन्यांचे कार्यक्रम बघायला मिळावे म्हणून आम्ही ही सेवा ‘गोड’ मानून घेत आहोत. शेवटी प्रत्येक गोष्टीला मर्यादा असते. ती मर्यादा ओलांडायला लागण्यापूर्वी या सेवेच्या व्यवस्थापनाने सेवेत सुधारणा करावी, असे केबल ग्राहक असलेल्या प्रशील पारकर यांनी गोमन्तकला सांगितले.