IFFI Goa 2024: चित्रपट महोत्सवाला तुडुंब गर्दी; मात्र फोंड्याच्या ‘मूव्ही मॅजिकला’ अजूनही प्रेक्षक मिळेना

फोंडा: गोव्यात सध्या आंतराष्ट्रीय चित्रपट महोत्सवाचे वातावरण आहे. पणजी, पर्वरी, मडगाव यांसारख्या प्रमुख ठिकाणी इफ्फीच्या निमित्ताने देश विदेशातील चित्रपट दाखवले जातेयत. गोव्याचे कृषी मंत्री तसेच फोंड्याचे आमदार रवी नाईक यांनी पुढाकार घेतल्यामुळे फोंड्यात यंदा ‘इफ्फी’ चे चित्रपट दाखवले जात होते तरीही रसिकांकडून मात्र या चित्रपटांना अगदी थंडा प्रतिसाद मिळत असल्याचे दिसत आहे.

फोंडा मार्केट यार्डमध्ये असलेल्या मूव्ही मॅजिक या चित्रपटगृहात इफ्फीच्या निमित्ताने चित्रपट दाखवले जात असले तरीही प्रेक्षकांचे पाय मात्र अजून या चित्रपटांकडे वळलेले दिसत नाहीत. वास्तविक २००८ नंतर पहिल्यांदाच फोंड्यात इफ्फीचे चित्रपट दाखवले जात असल्यामुळे या चित्रपटांना प्रेक्षकांची गर्दी होणं अपेक्षित होतं पण शुक्रवार, शनिवार, रविवार या गेल्या तीन दिवसांची उपस्थिती पाहता ही अपेक्षा फोल ठरली आहे.

यंदा फोंड्यात इफ्फीचे चित्रपट प्रदर्शित होत असले तरी त्याला प्रसिद्धीची योग्य किनार मिळालेली नाही. बस स्टॅन्ड, बाजार सारख्या मोक्याच्या ठिकाणी प्रसिद्धी फलक लावले असते तर लोकांना या चित्रपटांची माहिती मिळाली असती.

यावर्षी इफ्फीच्या चित्रपटांचा फोंड्यात हवा तसा गाजावाजा होऊ शकला नाही आणि म्हणून कदाचित प्रेक्षकांपर्यंत ही माहिती पोहोचली नसावी पण पुढच्या वर्षी सर्व खबरदारी घेऊन हे चित्रपट दाखवण्यात येतील, त्याचप्रमाणे या प्रदर्शनाला व्यापक स्वरूपही देण्यात येईल अशी खात्री आयोजकांनी व्यक्त केली आहे.