Cash For Job Scam: लाखोंचा गंडा घालणाऱ्या 'दीपश्री'ला कोर्टाचा पुन्हा दणका; सुनावली 8 दिवसांची पोलिस कोठडी

Deepashri Sawant Police Custody: सरकारी नोकरीचे आमिष दाखवून लाखोंचा गंडा घालणाऱ्या दीपश्री सावंतच्या अडचणी काही केल्या कमी होण्याचं नाव घेत नाहीयेत. फोंडा न्यायालयाने दीपश्रीला पुन्हा एकदा झटका दिला. न्यायालयाने दीपश्रीला आठ दिवसांची पोलिस कोठडी सुनावली.

दीपश्रीची 14 दिवसांची पोलिस कोठडी संपल्यानंतर पोलिसांनी तिला न्यायालयात हजर केले होते. सुनावणीदरम्यान पोलिसांनी न्यायालयाकडे पुन्हा एकदा दीपश्रीच्या पोलिस कोठडीची मागणी केली होती. न्यायालयानेही पोलिसांनी केलेली मागणी रास्त ठरवत दीपश्रीची पोलिस कोठडीत रवानगी केली. दरम्यान, पोलिसांनी दीपाश्रीकडून तीन कार आणि दोन दुचाकी ताब्यात घेतल्या आहेत.

दरम्यान, सरकारी नोकरीच्या आमिषातून कित्येकांनी आयुष्याची कमाई दीपश्रीच्या घशात घातली. दीपश्रीने मात्र त्यांना नोकरीच्या नावाखाली आश्वासनांची खैरात वाटली. नोकरीसाठी लोकांकडून उकळलेल्या लाखो रुपयांतून तिने स्वत:चे उखळ पांढरे करतानाच मुक्त हस्ताने देवधर्मही केला.

गावातील देवीला दागिने अर्पण करतानाच तिने वारकरी मंडळालाही देणगी दिल्याची माहिती उघड झाली आहे. सरकारी नोकरीसाठी अनेकांना लाखो रुपयांना टोपी घालणाऱ्या दीपश्रीने आतापर्यंत कोट्यवधी रुपयांची माया जमविली आहे.

दुसरीकडे, पोलिस कोठडीत दीपश्री रोज नव-नवे खुलासे करत आहे. आतापर्यंत किती लोकांना गंडा घातला या माहितीबरोबच दीपश्रीचे राजकीय कनेक्शनही पोलिस शोधतायेत. राजकीय कनेक्शनशिवाय दीपश्री एवढा मोठा गंडा घालूच शकत नाही असा पोलिसांना संशय आहे.