Bison In Ponda: फोंडा शहरात गव्यांचा मुक्त संचार! रहिवाशांत भीतीचे वातावरण, त्वरित बंदोबस्त करण्याची मागणी

Bison Sighting In Ponda Goa

फोंडा: फोंडा शहरात आता दिवसाढवळ्या गवे भटकंती करू लागले असून थेट रस्त्यावरून आत गल्लीबोळात गवे दिसू लागल्यामुळे रहिवाशांत भीतीचे वातावरण पसरले आहे.

अचानकपणे गवे फोंडा शहर तसेच ढवळी भागात दिसू लागल्यामुळे या गव्यांच्या हल्ल्याची भीती स्थानिकांना लागून राहिली असून वन खात्याने या गव्यांचा त्वरित बंदोबस्त करावा, अशी जोरदार मागणी करण्यात येत आहे.

दहा दिवसांपूर्वी फोंडा बसस्थानक तसेच वरचा बाजार भागात एका भल्या मोठ्या गव्यांचे दर्शन रात्रीच्यावेळी लोकांना झाले होते. त्यानंतर याबाबतची माहिती वन खात्याला दिल्यानंतर खात्याच्या कर्मचाऱ्यांनी या गव्याला शांतीनगर - फोंडा भागातून रानात पिटाळले होते. पण आता गवे पुन्हा एकदा फोंडा आणि ढवळी परिसरात दिसू लागल्यामुळे खुलेआम भटकणाऱ्या या गव्यांमुळे लोकांत भीतीचे वातावरण पसरले आहे.

ढवळी येथील मुख्य रस्त्यावर एका भल्या मोठ्या गव्याची भटकंती काल दिसून आली. त्यापूर्वी वरचा बाजार फोंडा भागातही असाच एक गवा भटकत होता.

ढवळी येथील मुख्य रस्त्यावरून हा गवा रेडा देवस्थानच्या घुमटीजवळून येथील रहिवासी कॉलनीत घुसला, त्यानंतर तो गायब झाला. विशेष म्हणजे यावेळी रहिवासी कॉलनीत एक मुलगा चालत आपल्या घरी जात असताना त्याच्या मागून येणारा गवा रेडा त्याला दिसला नाही. मात्र या मुलाच्या लक्षात हा प्रकार आल्यानंतर त्याने धूम ठोकल्याने तो बचावला.

बेतोडा-कुर्टीत गवे

बेतोडा तसेच कुर्टी भागातील डोंगरावरील रानातून हे गवे रेडे फोंडा शहरात येत असल्याचे निदर्शनास आले आहे. बेतोडा भागात दोन महिन्यांपूर्वी एका महिलेला गव्याने शिंग खुपसून ठार मारले होते. बेतोडा तसेच कुर्टी भागात डोंगरावरील रानातून हे गवे लोकवस्तीत खाण्याच्या उद्देशाने येत आहेत. मागच्या काळात कुर्टी भागात गवे कळपाने फिरत असल्याचे दिसले होते, त्यानंतर केरी, खांडेपार, बेतोडा भागात खुले आम गव्या रेड्यांनी हैदोस घालून लोकांची केळी तसेच इतर बागायतीत उच्छाद मांडला होता.