Ponda: फोंड्यात वाहतूकीचा बोजवारा; पालिकेत राखीव जागा असून रस्त्यावरच पार्किंग, नागरिकांची कुचंबणा

Ponda Traffic Issues

फोंडा: फोंडा बाजार हा शहराचा महत्त्वाचा भाग असून येथे नेहमीच वर्दळ असते. त्यातच वाहने रस्त्यावरच पार्क करून जाणाऱ्या बेशिस्त नागरिकांमुळे वाहतूक कोंडीत भर पडली आहे. वास्तविक पालिका इमारतीच्या तळघरात पार्किंगसाठी एैसपैस जागा केली असूनही लोक रस्त्यावरच वाहने उभी करताना दिसतात.

प्रभू टॉवर्स ते शांतीनगर जंक्शन या रस्त्यावर वाहने उभी केली जात असल्यामुळे बऱ्याच वेळा वाहतूक कोंडी होताना दिसते. हा रस्ता अरुंद असल्यामुळे तिथे एखादे वाहन जरी पार्क केले तरी वाहतूक कोंडी होते.

त्यामुळे दोन्ही बाजूला वाहनांच्या रांगा लागलेल्या आढळून येतात. यामुळे बऱ्याच वेळा वाहनचालकात ‘तू-तू मै-मै’चे प्रकार घडताना दिसतात. हल्लीच बेकायदा पार्क केलेल्या एका वाहनचालकात आणि घरमालकात खडाजंगी झाली होती. वाहतूक पोलिसांनी हस्तक्षेप केला नसता तर हे प्रकरण चिघळले असते. ‘तालांव’ देऊनही बेकायदेशीर पार्किंगचे प्रकार थांबत नसल्यामुळे हा प्रश्न अधिकच बिकट बनला आहे. आता फोंडा पालिकेने काही ठिकाणी पे-पार्किंग करायचे ठरविले असले तरी ते किती यशस्वी होते, हे बघावे लागेल. पालिकेने पार्किंगसाठी जिथे जागा राखून ठेवल्या आहेत, तिथेच वाहने पार्क करा, असे आवाहन कृषिमंत्री रवी नाईक यांनी केले आहे.

वाहतूक पोलिस दक्ष पण...

फोंड्याचे वाहतूक पोलिस दक्ष झाले असून ते बेकायदा वाहने उभी करणाऱ्यांवर कडक कारवाई करताना दिसतात. खास करून वाहतूक पोलिस उपनिरीक्षक आदित्य नाईक गावकर आणि हवालदार किशोर मोरे यांनी बेकायदेशीर पार्किंगचा मेसेज मिळताच ताबडतोब कृती करण्याची मोहीम आखली असून वाहनचालकांवर वचक बसविला आहे. पण तरीही पोलिसांची कुमक कमी पडत असल्यामुळे बेशिस्त वाहनचालकांचे फावते.

सीसीटीव्ही कॅमेरे हवेत

शहरात सीसीटीव्ही कॅमेरे लावणे गरजेचे आहे. त्यामुळे बेकायदेशीर पार्किंग केलेल्या वाहनांचे क्रमांक मिळू शकतील. आता फोंडा बाजारात प्रभू टॉवर्सजवळ पालिकेने सीसीटीव्ही कॅमेरे बसविण्याचे ठरविले आहे.