Ponda By Election: फोंडा पोटनिवडणुकीसाठी भरपगारी सुटी जाहीर; रोजंदारी, कंत्राटी कामगारांसाठीही सुटी अनिवार्य

पणजी: भारतीय निवडणूक आयोगाने ९ एप्रिल रोजी फोंडा मतदारसंघात होणाऱ्या पोटनिवडणुकीसाठी त्या मतदारसंघातील मतदारांसाठी भरपगारी सुटी जाहीर केली आहे.

''लोकप्रतिनिधित्व अधिनियम १९५१'' च्या कलम १३५ ब नुसार, कोणत्याही व्यवसाय, व्यापार, औद्योगिक उपक्रम किंवा इतर कोणत्याही आस्थापनेत कार्यरत असलेल्या राज्यांच्या ''विधानसभा'' पोटनिवडणुकीत मतदान करण्यास पात्र असलेल्या प्रत्येक व्यक्तीला मतदानाच्या दिवशी भरपगारी सुटी देण्यात येईल, असे जाहीर केले आहे.

या दिवशी वेतनात कोणतीही कपात केली जाणार नाही. या तरतुदींचे उल्लंघन करणारा कोणताही व्यक्ती दंडास पात्र ठरेल. आयोगाने राज्य सरकारला निर्देश दिले आहेत की, या तरतुदींचे काटेकोर पालन करण्यासाठी संबंधित सर्वांना आवश्यक ते निर्देश द्यावेत आणि सर्व मतदार आपला मतदानाचा हक्क मुक्तपणे व सोयीस्करपणे बजावू शकतील, याची खात्री करावी.

रोजंदारी, कंत्राटी कामगारांसाठीही सुटी अनिवार्य

सर्व रोजंदारी आणि कंत्राटी कामगार देखील मतदानाच्या दिवशी भरपगारी सुटी मिळण्यास पात्र असल्याचे आयोगाने सांगितले आहे. आयोगाने पुढे असेही स्पष्ट केले आहे की, जे मतदार (यात कंत्राटी आणि रोजंदारी कामगारांचा समावेश आहे) आपल्या स्वतःच्या मतदारसंघाबाहेर स्थित औद्योगिक किंवा व्यावसायिक आस्थापनांमध्ये कार्यरत आहेत, परंतु ज्यांची मतदार म्हणून नोंदणी त्या मतदारसंघात झाली आहे जिथे मतदान होणार आहे; त्यांनाही मतदानाच्या दिवशी आपला मतदानाचा हक्क बजावता यावा यासाठी भरपगारी सुटीचा लाभ मिळण्याचा अधिकार असेल.