Canacona: काणकोणातील गावांत प्रदूषित पाणी! नागरिकांना धोका

काणकोण: काणकोणमधील विविध गावांत सार्वजनिक जलपुरवठा खात्यातर्फे प्रदूषित जल वितरण करण्यात येत आहे. त्यामध्ये सुधारणा करा किंवा काणकोणमधील नागरिकांच्या प्रखर विरोधाला सामोरे जा, असा इशारा व्हिजन आणि मिशन प्रोग्रेसिव्ह काणकोणतर्फे आज घेण्यात आलेल्या पत्रकार परिषदेत देण्यात आला.

आगोंद पंचायत क्षेत्रात गेल्या काही वर्षांपासून असुरक्षित व टॉक्सिक पाणीपुरवठा करण्यात येत आहे. यासंदर्भात यापूर्वी जनार्दन भंडारी यांनी आवाज उठवला होता. या पंचायत क्षेत्रात प्रदूषित जलपुरवठा करण्यात येत असल्याची तक्रार काणकोण पोलिसांत व अन्यत्र दाखल केल्यानंतर काणकोण सामाजिक आरोग्य केंद्राला पोलिसांनी या पाण्याचे नमुने तपासणीसाठी घेऊन प्रयोगशाळेत पाठविण्याची सूचना केली होती. त्याचा निरीक्षण अहवाल आता आला आहे.