पणजीतील सामान चोरीप्रकरणी संशयितांना पोलिस कोठडी

पणजी: राजधानी पणजीत पार्क केलेल्या वाहनाची काच फोडून आतील सामानाची चोरी केल्याप्रकरणी अटकेत असलेल्या तिघांच्या टोळीला आज न्यायालयाने चार दिवसांची पोलिस कोठडी दिली आहे. प्राथमिक चौकशीत संशयितांची पार्श्‍वभूमी गुन्हेगारीची आहे. हे तिघेही मूळ कर्नाटकातील असल्याने तेथील पोलिसांशी संपर्क साधण्यात आल्याची माहिती पोलिस अधिकाऱ्यांनी दिली.

(Police custody of suspects in Panaji theft case)

पणजी पोलिसांनी संशयित श्रीशांत शेकू राठोड, सुनील हनमुंत माधव व सिकंदर ऊर्फ चिकू शेख अब्दुल बडेसाहब याना शिताफीने अटक केल्यानंतर त्यांनी चोरलेला माल जप्त केला होता. गुन्ह्यासाठी त्यांनी वापरलेली गाडीही जप्त केली आहे. राज्यात व कर्नाटकमध्ये तिघांचा इतर गुन्ह्यांमध्ये समावेश आहे का याची माहिती घेण्यात येत आहे. या टोळीमध्ये आणखी काहीजणांचा समावेश असण्याची शक्यता नाकारता येत नाही. तिघांची गुन्हेगारी पार्श्‍वभूमी तपासून पाहण्यासाठी पोलिस कोठडी देण्याची विनंती करण्यात आली होती. जप्त केलेली गाडी संशयितांनी भाडेपट्टीवर घेतली होती. त्यामुळे या प्रकरणाशी गाडीचा चालकाचा काही संबंध आहे का याची पडताळणी करण्यात येत आहे.