Mandrem Crime: राजकीय विषय नाहीच! माजी सरपंच हल्लाप्रकरण उलगडले, 'जमीन विक्री' व्यवहाराची पार्श्वभूमी

Mahesh Konadkar Mandrem Assault Case

मोरजी: मांद्रेचे माजी सरपंच महेश कोनाडकर यांच्यावर जमीन विक्री व्यवहारातून हल्ला केल्याची कबुली हल्लेखोरांनी दिल्याची माहिती आज पोलिसांनी दिली. त्यामुळे या प्रकरणाला राजकीय रंग देण्याचा प्रयत्न असफल ठरला आहे.

ज्या सहा संशयितांना पोलिसांनी पकडले आहे, त्यातील तिघेजण जमीन खरेदी-विक्री व्यवहारात गुंतले आहेत. या तिघांनी शिवोली येथील एका जमीन विक्रीचा व्यवहार सुरू केला होता. त्यानंतर महेश कोनाडकर यांनी त्या जमिनीचा विक्री व्यवहार केला.

त्या रागातूनच कोनाडकर यांच्यावर प्राणघातक हल्ला केला, अशी माहिती मांद्रेचे पोलिस निरीक्षक नारायण चिमुलकर यांनी दिली. अजूनही अधिक माहिती मिळविण्यासाठी सहाही संशयितांना पोलिस कोठडी बजावल्यामुळे पोलिस तपासानंतरच या प्रकरणावर अधिक प्रकाशझोत पडेल, असे चिमुलकर म्हणाले.

संशयितांनी पाेलिसांना सांगितले की, आम्ही शिवोली येथील एक जागेचा व्यवहार केला होता. त्याच जागेचा व्यवहार महेश कोनाडकर हे करत असल्यामुळे आम्हाला त्यांचा राग होता. म्हणून आम्ही त्यांच्यावर हल्ला केला. कोनाडकर यांच्यावर चार डिसेंबर रोजी खुनी हल्ला झाला होता. ‘तुका मायकल लोबो जाय?’ असे विचारत बुरखाधारी हल्लेखोरांनी त्यांना मारहाण केली होती.

संशयितांची जामिनावर सुटका

खुनी हल्ला प्रकरणातील सहा संशयितांना पोलिसांनी आज न्यायालयात हजर केले असता, त्यांना पोलिस कोठडी देण्यास नकार दिला आणि त्यांना न्यायालयीन कोठडी मंजूर झाली. त्यांना प्रत्येकी दहा हजार रुपयांच्या वैयक्तिक जातमुचलक्यावर जामीन मंजूर करण्यात आला.