'..गोव्याच्या भूमीने मला या पदापर्यंत पोहचवले'! पंतप्रधानांचे प्रतिपादन, पर्तगाळ मठात श्रीराम भक्तांची अलोट गर्दी; मोदी मोदी नावाचा गजर

गोकर्ण पर्तगाळ मठाच्या ५५०व्या वर्धापनदिन सोहळ्यात शुक्रवारी पंतप्रधान नरेंद्र मोदी यांच्या हस्ते श्रीरामाच्या ७७ फूट उंचीच्या भव्य पुतळ्याचे अनावरण करण्यात आले. हजारो लोकांच्या साक्षीने झालेल्या या सोहळ्यात पदोपदी चैतन्याची अनुभूती आली.

जीवोत्तम पर्तगाळ मठ ऊर्जेचा स्रोत

जीवोत्तम पर्तगाळ मठ हा ऊर्जेचा स्रोत असून श्री संस्थान पर्तगाळी मठ लोकांना एकत्र आणण्यासाठी महत्त्वाचा दुवा आहे. या मठाने आध्यात्मिक परंपरा जीवंत ठेवतानाच सेवाभावही जोपासला. माणसांना जोडण्याचे काम या मठाने निरंतर केले आहे. संकटावेळी समाजाला यथोचित मदत करण्याचे काम या मठाने केल्यामुळे या राज्यातील संस्कृती अबाधित राहिली, असे मत पंतप्रधान नरेंद्र मोदी यांनी व्यक्त केले.

मोदी म्हणाले, की परंपरा टिकून राहिल्यास विकास होतो. मठाने ५५० वर्षे जी आध्यात्मिक ऊर्जा दिली, ती ऊर्जा पुढील पिढीला द्यायला हवी. गोव्याची भूमी माझ्यासाठी नेहमीच ‘टर्निंग पॉईंट’ ठरते. कारण गोव्याच्या भूमीने मला या पदापर्यंत पोहचवले. गोवा दरडोई उत्पन्नात आघाडीवर आहे. गोव्याने पर्यटन क्षेत्रात आणि पायाभूत विकासात प्रगती साधली आहे.

यावेळी श्रीमद् विद्याधीश तीर्थ स्वामीजी, मठ समितीचे अध्यक्ष श्रीनिवास धेंपे, उपाध्यक्ष आर. आर. कामत, राज्यपाल पी. अशोक गजपती राजू, मुख्यमंत्री डॉ. प्रमोद सावंत, केंद्रीय मंत्री श्रीपाद नाईक, क्रीडा मंत्री रमेश तवडकर, दिगंबर कामत उपस्थित होते. श्रीनिवास धेंपे यांनी स्वागत केले. पंतप्रधान मोदी म्हणाले, अयोध्येत धर्मध्वज फडकावण्याचे सद्‍भाग्य लाभले. आज श्रीरामाच्या प्रतिमेचे अनावरण करण्याचे भाग्य लाभत आहे.

श्रीराम नाम जप यज्ञ हा सामूहिक ऊर्जेचे प्रतीक बनला आहे. ही ऊर्जा आध्यात्मिक प्रेरणेचा स्रोत बनली आहे. अयोध्येत राममंदिराची पुनर्उभारणी, कुंभमेळ्याचे अभूतपूर्व आयोजन भारताला नव्या आत्मविश्‍वासाने पुढे नेत आहे. गोव्याच्या पवित्र भूमीला शतकांची आध्यात्मिक परंपरा आहे. जीवोत्तम मठाच्या विकसित भारताचा मार्ग एकतेतून जातो. स्वामीजींनी मला एकादशीचे कार्य दिले.

पंतप्रधान मोदी ‘धर्मपुत्र’

श्रीमद् विद्याधीश तीर्थ स्वामीजी म्हणाले, पंतप्रधान नरेंद्र मोदीजींच्या उपस्थितीमुळे आजचा दिवस मठाच्या इतिहासात सुवर्णाक्षरांनी लिहून ठेवण्यासारखा आहे. मोदीजी चातुर्मास व्रताचे एकभुक्त राहून पालन करतात. नवरात्रातही ते उपवास करतात, ही अतिशय उल्लेखनीय बाब आहे. अयोध्येत त्यांनी रामलल्लाच्या मंदिराची उभारणी केली. आज दक्षिण अयोध्येत म्हणजेच पर्तगाळ मठाच्या प्रांगणात श्रीराम प्रतिमेचे अनावरण केले. त्यांचे कार्य श्रीकृष्णासारखे आहे. त्यामुळे ते खऱ्या अर्थाने ‘धर्मपुत्र’ आहेत.

‘रामायण थीम पार्क’ होणार धार्मिक पर्यटनाचे केंद्र

पर्तगाळ मठ परिसरात बाणाच्या आकाराचे रामायण थीम पार्क उभे राहात असून हे पार्क भविष्यात भारतातील प्रमुख धार्मिक पर्यटनाचे केंद्र ठरणार, असे भाकीत आज पंतप्रधान नरेंद्र मोदी यांनी केले. त्यापूर्वी मुख्यमंत्री डॉ. प्रमोद सावंत यांनी, गोवा हे धार्मिक पर्यटनाचे कॉरिडॉर बनविण्याचे सरकारचे लक्ष्य आहे. त्यात या पार्कचा प्रामुख्याने समावेश असेल, असे सांगितले.

‘स्वरभक्ती’तून प्रेक्षकांचे मनोरंजन

‘स्वरभक्ती’ या कार्यक्रमाने दु. १ वा.पासून पंतप्रधानांच्या सभामंडपात बसलेल्या प्रेक्षकांचे सुमारे दोन तास मनोरंजन केले. मंदार आपटे व साथीच्या गायनाने सभामंडपात एक वाजल्यापासून बसलेल्या प्रेक्षकांची करमणूक केली. मंदार आपटे, विनय कौर, केतकी चैतन्य, धनंजय वसकर, गौतमी हेदे, अमर ओक, संदीप मयेकर, विष्णू शिरोडकर यांनी कला सादर केली.

पर्तगाळ मठात श्रीराम भक्तांची अलोट गर्दी

पंतप्रधान नरेंद्र मोदी यांच्या गोकर्ण पर्तगाळ मठाच्या ५५०व्या वर्धापनदिन सोहळ्याच्या कार्यक्रमात श्रीराम भक्तांनी अलोट गर्दी केली.

दु. ३.२५ वा. पंतप्रधानांना घेऊन येणारे हेलिकॉप्टर पर्तगाळी हॅलिपॅडवर उतरले. ३.४५ वा. पंतप्रधानांचे सभास्थळी आगमन झाले. त्यापूर्वी त्यांनी ७७ फूट उंचीच्या आशियातील उंच श्रीराम पुतळ्याचे अनावरण केले. त्याच मठातील वीर विठ्ठल मंदिराला भेट देऊन आशीर्वाद घेतले. यावेळी त्यांच्यासोबत मुख्यमंत्री डॉ. प्रमोद सावंत व मठाचे अध्यक्ष श्रीनिवास धेंपे उपस्थित होते.

पंतप्रधानांचे आगमन होण्यापूर्वी श्रीराम जयराम तारक मंत्राचा जयघोष उपस्थितांनी केला. या कार्यक्रमाला राज्यपाल पुसापती अशोक गजपती राजू, मुख्यमंत्री डॉ. प्रमोद सावंत व मंत्री दिगंबर कामत यांनी सभास्थळी सुमारे १.३० वा. उपस्थित राहून एकूण सभास्थळाची पाहणी केली. यावेळी मंत्री रोहन खंवटे, सुभाष फळदेसाई, विश्वजीत राणे व दिव्या राणे, केंद्रीय राज्यमंत्री श्रीपाद नाईक, रमेश तवडकर, मठ समितीचे अध्यक्ष श्रीनिवास धेंपे, उपाध्यक्ष आर.आर. कामत उपस्थित होते. कार्यक्रमाचे सूत्रसंचालन डॉ. रूपा च्यारी यांनी केले.

क्षणचित्रे

आज या सोहळ्यासाठी मोठ्या प्रमाणावर लोक आले होते. आयोजकांनी त्यांची चोख व्यवस्था ठेवली होती. लोकांना घटनास्थळी नेण्यासाठी बसेसची व्यवस्था केली होती. लोकांच्या जेवणाचीही सोय चोख होती. त्याशिवाय चहा-पाण्याची सोयही चांगली ठेवण्यात आली होती.

पंतप्रधान नरेंद्र मोदी पावणेचार वाजता घटनास्थळी पोहोचले. त्यांच्या हेलिकॉप्टरचा आवाज ऐकल्यावर श्रोत्यांनी त्यांच्या नावाचा जयघोष सुरू केला.

यावेळी मंदार आपटे आणि साथींनी सादर केलेला गाण्यांचा कार्यक्रम विशेष रंगला. गोमंतकीय गायिका गौतमी हेदे यांनी सादर केलेल्या ‘दामबाबा तू पाव रे’ या गाण्याला विशेष दाद दिली.

पंतप्रधान नरेंद्र मोदी जेव्हा श्रीरामाच्या मूर्तीचे अनावरण करत होते त्यावेळी सर्व श्रोते सभागृहांत रामनामाचा जप करत होते.

मोदी मोदी नावाचा गजर...

श्री गोकर्ण पर्तगाळ जीवोत्तम मठाच्या सार्थ पंचशताब्दी सोहळ्यानिमित्त आज ७७ फूट उंच श्रीरामाच्या पुतळ्याचे अनावरण हा मुख्य सोहळा असला तरी पर्तगाळ येथे जमलेल्या भाविकांना अधिक आकर्षण होते, ते पंतप्रधान नरेंद्र मोदी यांचेच.

नरेंद्र मोदी हे दुपारी पावणे चार वाजता आयोजन स्थळी येणार असले तरी येथील सभामंडप दुपारी दीड वाजताच लोकांनी तुडुंब भरला होता. मधला काळ भरून काढण्यासाठी प्रसिद्ध गायक मंदार आपटे आणि साथींच्या गायनाचा कार्यक्रम सुरू होता. श्रोते त्यात मंत्रमुग्ध झाले होते. तरीही लोकांना उत्सुकता होती ती नरेंद्र मोदी यांच्या आगमनाची. ज्यावेळी लोकांच्या कानी हेलिकॉप्टरची धडधड पडली तेव्हा सगळे लोक भारावून उभे राहिले आणि त्यांच्या तोंडातून उत्स्फूर्त नारे सुरू झाले... मोदी, मोदी, मोदी...

जिथे रामाच्या मूर्तीचे अनावरण व्हायचे होते त्या ठिकाणी सुरक्षेच्या प्रोटोकॉलमुळे कुणालाही जाता येत नव्हते. मात्र, सभामंडपात लावलेल्या स्क्रीनवर हा सोहळा लोकांनी पाहिला. हा सोहळा सुरू असताना श्रोते, श्रीराम जय राम जय जय राम हा मंत्रघोष करण्यात मग्न होते.

नरेंद्र मोदी यांच्या कार्याची जेव्हा गोकर्ण पर्तगाळ मठाधीश श्रीमद् विद्याधीश तीर्थ स्वामीजी उल्लेख करत होते, त्यावेळीही श्रोत्यांनी ‘मोदी मोदी’ अशीच दाद दिली. ज्यावेळी मोदी यांनी आपल्या भाषणाची सुरुवात कोकणीतून केली त्यावेळीही श्रोत्यांनी तेवढीच भारावून दाद दिली.

गोकर्ण पर्तगाळ जीवोत्तम मठाची स्थापना श्रद्धा, भक्ती, सेवा तत्त्वावर

गोकर्ण पर्तगाळ जिवोत्तम मठाची स्थापना श्रद्धा, भक्ती व सेवा या तत्त्वावर झाली आहे. त्याला नवा आयाम श्रीमद् विद्याधीश तीर्थ स्वामीजींनी दिला आहे, असे मत मुख्यमंत्री डॉ. प्रमोद सावंत यांनी मठाच्या ५५०व्या वर्धापनदिन सोहळ्यात पंतप्रधान नरेंद्र मोदी यांच्या उपस्थितीत व्यक्त केले.

श्रीमद्‌ माधवाचार्यांनी याच तत्त्वावर ५५० वर्षांपूर्वी या मठाची स्थापना केली, ती गुरुपरंपरा २४ मठाधिपती चालवत आहेत. इतिहासाच्या काळात मठ व राज्यातील देव-देवालये यांच्यावर आघात झाले.

सात वेगवेगळ्या सत्तांनी राज्यावर राज्य करून येथील धार्मिक व सांस्कृतिक सलोखा बिघडविण्याचा प्रयत्न केला; परंतु मठ व देवालयांनी आपल्या सांस्कृतिक व धार्मिक सलोख्याची पुनर्स्थापना केली. राज्यात हातुर्ली मठ, कुंडई येथील मठ यांची मठ परंपरा आहे. येथील भजन, कीर्तन संस्कृती उच्च पराकोटीची आहे.

त्यातूनच राज्याचा आध्यात्मिक विकास होत आहे. राज्यात ज्यांनी ही भूमी निर्माण केली असे मानले जाते त्यांचा भव्य पुतळा मांडवी नदीच्या काठी उभारण्यात आला आहे. योगसेतू, ज्ञान सेतू यांचे निर्माण करण्यात आले आहे, त्यामागे एकच भावना आहे ती राज्यात आध्यात्मिक पर्यटनाला चालना देणे.

राज्यातील कदंब काळातील सप्तकोटेश्वर मंदिराचे पुनर्निमाण याच हेतूने करण्यात आले आहे. दिवाडी बेटावर पोर्तुगिजांनी ज्या मंदिरांचा विध्वंस केला त्याची स्मृती म्हणून ‘कोटी तीर्थ’ या नावाने उभारणी करण्यात येणार आहे. भारत २०४७ सालापर्यंत विकसित करण्याचा केंद्र सरकारचा मनोदय आहे. मात्र, राज्य हे उद्दिष्ट २०३७ पर्यंत पूर्ण करेल, असा विश्वास मुख्यमंत्र्यांनी यावेळी व्यक्त केला.