काणकोणातील अंतर्गत रस्त्यांची दुर्दशा

काणकोण: काणकोणमधील अंतर्गत रस्त्यांची खड्ड्यांमुळे दुरवस्था झाली आहे. निवडणुकीपूर्वी डांबरीकरण करण्यासाठी काही रस्त्यांची झाडलोट करण्यात आली होती; मात्र त्यानंतर त्या रस्त्यांचे डांबरीकरण करण्यात आलेले नाही. पैंगीण पंचायत क्षेत्रातील वेलवाडा येथील अंतर्गत रस्त्यावर ठिकठिकाणी डांबर उखडून खड्डे पडले आहेत.

पालिका क्षेत्रातील पणसुले रस्त्याची वाताहत झाली आहे. या रस्त्यांवर अपघातांना कारणीभूत ठरणारे खड्डे आहेत. किमान हे खड्डे बुजवण्यात यावेत, अशी मागणी पणसुलेवासीय करत आहेत.

या रस्त्यांवर वाहने सोडाच चालणेसुद्धा कठीण बनल्याचे आल्फर फर्नांडिस यांनी सांगितले. किमान पावसाळ्यापूर्वी दूरवस्था झालेल्या अंतर्गत रस्त्यांचे डांबरीकरण करावे, अशी मागणी करण्यात येत आहे. असे रस्ते पैंगीण, गावडोंगरी, खोतीगाव, श्रीस्थळ, आगोंद व पालिका क्षेत्रात आहेत. तालुक्यातील दुर्दशा झालेल्या रस्त्यांच्या दुरुस्तीची मागणी होत आहे.