Mapusa : थिवी येथे भूमिगत वीजवाहिन्या टाकताना जलवाहिनी फुटल्‍याने सध्या कोलवाळ गावातील पाणीपुरवठ्यावर परिणाम झाला आहे. मागील दोन दिवस पाणी नसल्याने लोकांची गैरसोय झाली आहे. लवकरात लवकर जलवाहिनी दुरुस्त करावी किंवा पर्यायी व्यवस्था करावी, अशी मागणी स्थानिक रहिवाशांनी साबांखाकडे केली आहे. अन्‍यथा रस्‍त्‍यावर उतरून आंदोलन करण्‍याचा इशाराही त्‍यांनी दिला आहे.
प्राप्त माहितीनुसार, सध्या वीज खात्यातर्फे थिवी वीजकेंद्र ते पेडणेपर्यंत ३३ केव्ही भूमिगत वीजवाहिन्या नेण्याचे काम सुरू आहे. या खोदकामावेळी थिवी येथे दूरध्वनी एक्सचेंज केंद्रानजीक कोलवाळ गावाला पाणीपुरवठा करणारी जुनी जलवाहिनी फुटली. तेथे भूमिगत जलवाहिनी असल्याची पूर्वकल्पना कंत्राटदाराला देण्यात आली होती. तरीसुद्धा हा प्रकार घडलाच. कंत्राटदाराचा निष्‍काळजीपणाच या गोष्‍टीस कारणीभूत आहे. त्‍यामुळे लोकांनी संताप व्‍यक्त केला आहे.
सदर जलवाहिनी ८ जुलै रोजी फुटली, मात्र दोन दिवसांनंतर काल सोमवारी दि. १० रोजी फुटलेल्‍या जलवाहिनीचे स्थान शोधून काढले गेले. सदर जलवाहिनी जुनी असल्यामुळे तिला जोडण्यासाठी दुसरी जलवाहिनी उपलब्ध नाही. परिणामी, दुरूस्तीच्या कामात अडथळा निर्माण झाला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
