Bicholim Mining: 'मागण्या मान्य झाल्या नाहीत तर कायदेशीर लढा'; पिळगावमधील शेतकऱ्यांचा निर्धार

Pilgao Farmers Protest Vedanta Mining Dispute

डिचोली: मागण्या पुढे करून रस्त्यावर उतरलेल्या पिळगावमधील शेतकऱ्यांचे आंदोलन अजूनही सुरूच आहे. येत्या सोमवारपर्यंत आमच्या मागण्या मान्य झाल्या नाहीत, तर कायदेशीर लढा देणार, असा इशारा आंदोलनकर्त्या शेतकऱ्यांनी दिला आहे. आज (शुक्रवारी) शेतकऱ्यांनी डिचोलीचे उपजिल्हाधिकारी रोहन कासकर यांना पुन्हा एकदा मागण्यांचे निवेदन दिले आहे.

दरम्यान, पिळगावमधील शेतकऱ्यांचे आंदोलन मिटण्याची चिन्हे दिसत असून, पुढील आठवड्यापर्यंत शेतकऱ्यांच्या मागण्यांवर सकारात्मक तोडगा निघण्याची शक्यता आहे. त्यादृष्टीने सरकार तसेच ‘वेदान्ता’च्या व्यवस्थापनाकडून जोरदार प्रयत्न सुरू आहेत, अशी विश्वसनीय सूत्रांकडून माहिती मिळाली आहे. शेतीसंदर्भातची मागणी ‘वेदान्ता’ कंपनीकडून विचारात घेण्यात आली असून, केवळ ’रिट्रेंच’ कामगारांसंबंधीच्या मागणीवर अद्याप अंतिम निर्णय झाला नसल्याची माहिती मिळाली आहे.

सुधाकर वायंगणकर आणि अनिल सालेलकर यांच्या नेतृत्वाखालील शेतकऱ्यांच्या एका गटाने आज सकाळी डिचोलीचे उपजिल्हाधिकारी कासकर यांची भेट घेतली. शेतकऱ्यांच्या या गटाने उपजिल्हाधिकाऱ्यांसमोर पुन्हा एकदा आपली कैफियत मांडून मागण्यासंदर्भात सकारात्मक तोडगा काढा, अशी विनंती केली. निवेदनाची एक प्रत शेतकऱ्यांनी आमदार प्रेमेंद्र शेट यांच्या कार्यालयात दिल्याची माहिती मिळाली आहे.

शेतकऱ्यांना नुकसान भरपाईच्या रूपाने शेतजमिनीच्या प्रतिचौरस मीटरमागे ५ हजार ४०० रुपये देऊन ही रक्कम पाच वर्षांत अदा करण्याचा प्रस्ताव विचाराधीन आहे. या प्रस्तावावर शिक्कामोर्तब होण्याचे बाकी असल्याचे समजते. दुसऱ्या बाजूने कपात केलेल्या कामगारांच्या मागणीवरही तोडगा काढण्यासाठी प्रयत्न सुरू आहेत. शेतकऱ्यांसह कामगारांच्या प्रस्तावाला सहमती दिली आणि तसा करार झाला, तर शेतकऱ्यांचे आंदोलन मिटण्याची शक्यता आहे.