Sanguem News: सांगेत भरपावसात टँकरद्वारे पाणी; लोक संतप्‍त

भरपावसात सांगेच्या काही भागात गेले तीन दिवस पाणी नसल्‍यामुळे लोकांनी संताप व्‍यक्त केला आहे. मिळालेल्या माहितीनुसार, शेळपे येथे पाणीपुरवठा करणारी जलवाहिनी फुटली असून तेथे दुसरी जलवाहिनी घालण्यासाठी पावसामुळे अडचणी येत आहेत. काही ठिकाणी टँकरद्वारे पाणीपुरवठा करण्‍यात आला. पावसात उभे राहून टँकरचे पाणी भरण्‍याची वेळ लोकांवर आली.

आज सलग तिसऱ्या दिवशी सांगे भागात पाणीपुरवठा झाला नाही. नगरसेवक मेशू डिकॉस्‍टा यांनी आपल्या प्रभागातील जनतेची पाण्यासाठी होणारी अडचण लक्षात घेऊन खास टँकरद्वारे नागरिकांना पाणीपुरवठा केला.

विहिरीतून जसे पाणी काढले जाते, त्याप्रमाणे इमारती राहणाऱ्या लोकांनी भांड्याला दोरी बांधून पाणी वर ओढून घेतले. पांगुणा, खैरीखाटे, पाजीमळ, भागातील नागरिकांना टँकरचे पाणी पुरविण्यात आले. उद्याही ही समस्या कायम राहिल्यास जनतेचे आणखी हाल होणार आहेत.