Goa Politics: राज्य प्रदेश निवडणूक समितीच्या अध्यक्षपदी पाटकर यांची नियुक्ती

Goa Politics: आगामी लोकसभा निवडणुकीच्या पार्श्‍वभूमीवर काँग्रेसच्या राज्य प्रदेश निवडणूक समितीच्या अध्यक्षपदी अमित पाटकर यांची नियुक्ती झाली आहे. अखिल भारतीय काँग्रेस समितीचे (एआयसीसी) अध्यक्ष मल्लिकार्जुन खरगे यांच्या मान्यतेनुसार ही नियुक्ती झाली असून एआयसीसीचे सरचिटणीस के. सी. वेणुगोपाल यांनी निवडीचे आदेशपत्र जारी केले आहे.

या समितीमध्ये पाटकर यांच्यासह अन्य नऊजणांचा समावेश करण्यात आला आहे. त्यात माजी प्रदेशाध्यक्ष तसेच एआयसीसीचे निमंत्रक सदस्य आणि चार राज्यांचे प्रभारी गिरीश चोडणकर यांचाही समावेश करण्यात आला आहे. त्यामुळे चोडणकर यांना गोव्यातील राजकारणावर लक्ष ठेवण्याची संधी मिळाली आहे. त्याशिवाय ते दक्षिण गोव्यातून निवडणूक लढविण्यासही इच्छुक आहेत.

उत्तर गोव्यापेक्षा दक्षिण गोव्यातून काँग्रेसकडून निवडणूक लढविण्यास अनेकजण इच्छुक असल्याचे दिसून आले आहे. उत्तर गोव्यातून निवडणूक लढविण्यास इच्छा व्यक्त करणाऱ्या रमाकांत खलप यांचाही या समितीमध्ये समावेश आहे.

प्रदेश निवडणूक समिती अशी ः अमित पाटकर, विरोधी पक्षनेते युरी आलेमाव, माजी प्रदेशाध्यक्ष गिरीश चोडणकर, खा. फ्रान्सिस सार्दिन, माजी मंत्री ॲड. रमाकांत खलप, आमदार एल्टन डिकॉस्ता, आमदार कार्लोस फेरेरा, एम. के. शेख, डॉ. प्रमोद साळगावकर आणि शंभू भाऊ बांदेकर.