Panaji Football Ground: कांपाल येथील बांदोडकर मैदानावर फुटबॉलचे सामने बंद झाले आणि पणजी व परिसरातील अनेक फुटबॉलपटूंची गैरसोय होऊ लागली. ताळगावात फुटबॉल मैदान असले तरी तेथे मोठे सामने किंवा स्पर्धा घेण्यासाठी मर्यादा येतात.
मात्र आता पणजीवासीयांचे फुटबॉल मैदानाचे स्वप्न लवकरच पूर्णत्वास येणार आहे. कांपाल येथील परेड मैदानावर फुटबॉल मैदान उभारण्‍याचे काम ४० टक्के पूर्ण झाले असून, उर्वरित ६० टक्के काम वर्षअखेरपर्यंत पूर्ण होणार असल्‍याचे कंत्राटदार कंपनीच्‍या अभियंत्‍याने सांगितले.
सदर मैदानावर आंतरराष्ट्रीय दर्जाचे नैसर्गिकरित्या गवत उगवून टर्फची निर्मिती करण्यात आली आहे. ‘इमॅजिन पणजी-स्मार्ट सिटी’ विकास महामंडळाचा हा उपक्रम असून, नगरविकास प्राधिकरणाच्या मदतीने तो पुढे नेण्यात येत आहे. महापालिकेने या मैदानावर टाकलेला कचरा हटविण्यात आला.
मैदानाच्या चोहोबाजूला हायमास्टचे दिवे असतील. पणजीच्या वैभवात हे मैदान भर घालेल, अशी रचना करण्यात येत आहे. एक-दोन दिवसाआड जिल्हाधिकारी स्वतः या मैदानाच्या कामाची पाहणी करतात, अशी माहिती त्‍या अभियंत्‍याने दिली.
दीड हजार लोकांची आसनक्षमता
या फुटबॉल मैदानावर सध्या प्रेक्षक गॅलरीचे काम सुरू आहे. सुमारे दीड हजार प्रेक्षक बसू शकतील अशा क्षमतेची गॅलरी उभारली जात आहे. गॅलरीच्या खालील बाजूस तळमजल्यावर पॅव्हेलियन, रेस्टॉरंट, चेजिंग रूम असेल.
शिवाय मैदानाच्या डाव्या बाजूला व्यायामशाळा असणार आहे. स्टेडियमच्या मागील बाजूस पार्किंगची सोय तर बांदोडकर मार्गाच्या बाजूला वृक्षारोपण, बालभवनाच्या समोरील मैदानावरील जागेत हरित आच्छादन असणार आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
