पणजी, महिलावर्गांकडून नेहमीच उत्साहाने आणि नेमकेपणाने कार्य होते. त्यामुळेच त्यांचे कार्य कौतुकास्पद आहे.
म्हणूनच सर्वसमावेशकता आणण्याच्या ध्यासातून प्रत्येक स्त्रीला सक्षम आणि कार्यकुशल करण्याचा आणि त्या माध्यमातून समाजामध्ये वैविध्यता आणि समानता वाढवण्याचा प्रयत्न केला जातो, असे मत राज्य दिव्यांगजन आयुक्त गुरुप्रसाद पावसकर यांनी व्यक्त केले.
गोवा राज्य दिव्यांगजन आयुक्त कार्यालयातर्फे रोटरी क्लब ऑफ पणजी रिव्हिएरा आणि डिसेबिलिटी अलायन्स फॉर इन्क्लुझिव्ह गोवा यांच्या संयुक्त विद्यमाने पर्वरी येथील संजय सेंटर फॉर स्पेशल एज्युकेशनमध्ये आतंरराष्ट्रीय महिला दिन-२०२४ कार्यक्रमाचे आयोजन करण्यात आले होते. या प्रसंगी विविध क्षेत्रांत चमकदार कामगिरी केलेल्या दिव्यांग महिलांचा सन्मान करण्यात आला.
प्रमुख पाहुण्या म्हणून गोवा राज्य दिव्यांगजन सक्षमीकरण विभागाच्या संचालिका मेघना शेटगांवकर उपस्थित होत्या. राज्य दिव्यांगजन आयुक्त गुरुप्रसाद पावसकर, डिसेबिलिटी अलायन्स फॉर इन्क्लुझिव्ह गोवाचे अध्यक्ष पॅट्रिक डिसोझा, राष्ट्रीय पॅरा ॲथलेटिक्स स्पर्धा व पॅरा खेलो इंडिया स्पर्धेतील सुवर्णपदक विजेती खेळाडू साक्षी काळे आणि रोटरी क्लब ऑफ पणजी रिव्हिएराचे अध्यक्ष डेन्झिल झेवियर यांची उपस्थिती होती.
पर्सी कार्दोझो यांनी मानसिक व शारीरिक आरोग्य आणि महिलांचे हक्क या विषयावर मार्गदर्शन केले. तस्मिया शेख यांच्या आभार मानले.
कर्तबगारांचा गौरव
गोवा राज्य जनगणना संचालनालयामध्ये सांख्यिकी प्रक्रिया सहाय्यक म्हणून काम करणाऱ्या रत्ना मोरे, गोवा राज्य राजभाषा संचालनालयामध्ये लेखापाल म्हणून काम करणाऱ्या निकिता कुट्टीकर (दोघी लोकोमोटर डिसॅबिलिटीची समस्या असलेल्या दिव्यांग व्यक्ती),
पणजीतील दिवाणी न्यायालयात निम्न विभागीय कारकून म्हणून कार्यरत संपदा नाईक (दृष्टिदोष असलेली व्यक्ती), गोवा राज्य अंध राष्ट्रीय संघटनेमध्ये संगणक व संगीत शिक्षिका रेशा वेर्णेकर (दृष्टिदोष), पर्वरीतील संजय स्कूलमधील शिक्षिका रिषिता रायकर (श्रवणदोष) आणि फॅशन डिझायनर सादिया बांदोडकर (श्रवणदोष) यांना यावेळी गौरविण्यात आले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.