Panaji: स्मार्ट सिटीची कामे 31 मार्चपर्यंत संपणार; कार्यकारी अधिकारी रॉड्रिग्स यांची माहिती

Panaji Smart City Work Updates

पणजी: स्मार्ट सिटी मिशनअंतर्गत दुसऱ्या टप्प्यातील कामे वेगाने सुरू झाली आहेत. परंतु या कामाची पाहणी शुक्रवारी इमेजिन पणजी स्मार्ट सिटी विकास लिमिटेडचे (आयपीएससीडीएल) मुख्य कार्यकारी अधिकारी संजित रॉड्रिग्स यांनी केली. दरम्यान, ही कामे ३१ मार्चपर्यंत संपणार असल्याचे त्यांनी प्रसारमाध्यमांना सांगितले.

आयपीएससीडीएलने उच्च न्यायालयाला आपल्या कामाचा आढावा अहवाल नुकताच सादर केला आहे. त्यात शहरातील खराब रस्ते आणि ठिकठिकाणी झालेल्या खोदकामांची छायाचित्रांसह माहिती दिली आहे.

याशिवाय हा अहवाल देताना कोणती कामे कोणत्या तारखेपर्यंत संपणार आहेत, हेही न्यायालयाला आयपीएससीडीएलने सांगितले आहे. त्यामुळे ३१ मार्च ही केंद्र सरकारने दिलेली अंतिम मुदत आयपीएससीडीएलला पाळावी लागणार आहे. रॉड्रिग्स म्हणाले मलनिस्सारणाच्या कामाचा भाग म्हणून १५ ठिकाणी जुने आणि नवीन मॅनहोल एकमेकांना जोडण्याचे काम सुरू आहे.