Smart City Road : पूर्वसूचनाच नसल्याने नागरिकांची तारांबळ; वाहतुकीवर परिणाम

Smart City Road :

पणजी, स्मार्ट सिटी मिशनअंतर्गत पणजीत मलनिस्सारण वाहिनी टाकण्याचे काम सुरू आहे. अजूनही सांतिनेज परिसरातील वाहिनी आणि चेंबरचे काम पूर्ण झालेले नाही. तोच आता आल्तिनो टेकडी परिसरात वाहिनीसाठी भूमिगत खोदकाम सुरू केले आहे.

त्यामुळे आल्तिनोवरून भाटलेत जाणाऱ्या वाहनांना हा मार्ग बंद झाला आहे. कोणतीही पूर्वसूचना न देता रस्ता खोदल्याने पणजीवासीयांना पुन्हा कंत्राटदारांनी गृहीत धरले की काय, असा प्रश्‍न उपस्थित केला जात आहे. त्यामुळे नागरिकांनी काम करणाऱ्या कर्मचाऱ्यांशी हुज्जत घालण्याचा प्रकारही घडला.

स्मार्ट सिटीच्या विविध कामांसाठी कंत्राटदार नेमले आहेत. पणजीतून आल्तिनोवरील मार्गावरून भाटले, ताळगाव, सांताक्रूझ परिसरात दररोज हजारो वाहने ये-जा करतात. त्यामुळे शनिवारी वाहनचालकांची तारांबळ उडाली.

नागरिकांना गृहीत धरूनच काम? ः स्मार्ट सिटीची कामे नागरिकांना गृहीत धरून करतात की काय, अशी शंका उपस्थित केली जात आहे. ज्या प्रभागात काम करायचे आहे, तेथील नगरसेवकालाही कामांची माहिती नसते.

त्यामुळे नगरसेवकांना त्रस्त नागरिकांच्या शिव्या खाव्या लागतात. या कामांविषयी दोन-तीन दिवस अगोदर जनजागृती केली जात नाही. त्यामुळेच नागरिकांना त्रास सहन करावा लागत आहे.

चारचाकी वाहनधारक त्रस्त

भाटले, सांताक्रूझ, ताळगावातील जे चारचाकी वाहनधारक पणजीत येण्यासाठी रोज आल्तिनोवरील या मार्गाचा अवलंब करतात, त्यांना तांबडीमाती, मधुबन कॉलनी, बालगणेश, कला अकादमी असा मार्ग स्वीकारावा लागला.

शिवाय पणजीतून भाटले, सांताक्रूझ किंवा ताळगाव परिसरात जाणाऱ्या चारचाकी वाहनधारकांना मळ्यातून किंवा कला अकादमी, बालगणेश, मधुबन कॉलनी, तांबडीमाती असा प्रवास करावा लागला. रस्ता बंद झाला असला तरी दुचाकीस्वारांना मात्र एकेरी वाहतूक करता येईल, एवढी जागा असल्याने ते या मार्गाचा वापर करताना दिसले.