Panaji Shigmotsav: पणजीत पहाटेपर्यंत ओस्सय ओस्सयचा गजर! 35 चित्ररथ, 18 रोमटामेळ, पारंपरिक नृत्यगटांचा सहभाग

पणजी: गोव्याच्या सांस्कृतिक वैभवाचे प्रतीक असलेला पणजी शिगमोत्सव यंदा पर्यटकांसाठी अभूतपूर्व अनुभव ठरला. रंगीबेरंगी रोषणाई, पारंपरिक ढोल-ताशांच्या गजरात काढलेले रोमटामेळ, कल्पकतेची उंची गाठणारे चित्ररथ आणि उत्साही कलाकारांच्या वेशभूषेने सारा आसमंत भारावला होता. हा उत्साह एवढा उंचावला की, शिगमोत्सव पहाटे सहा वाजेपर्यंत रंगला.

शहरातील प्रमुख मार्गावर रात्री उशिरापर्यंत गर्दी होती. जुने सचिवालय ते कांपाल मार्गावर काढलेल्या मिरवणुकीसाठी स्थानिकांसह देश-विदेशातील पर्यटकांनी मोठी गर्दी केली होती. चित्ररथ, लोकनृत्य, रोमटामेळ पाहण्यासाठी रस्त्याच्या दोन्ही बाजूंना प्रचंड उत्साह दिसत होता. मध्यरात्रीनंतरही लोकांची अफाट गर्दी पाहून वातावरण जणू दुपारसारखं भासत होतं.

शहरात एवढी गर्दी उसळली की, मध्यरात्रीच्या सुमारास अनेक ठिकाणी वाहतूक कोंडी झाली होती. पर्यटकांनी मात्र याचा फारसा त्रास न मानता, रस्त्यावरच नाचत, फोटो काढत शिमगोत्सवाचा आनंद लुटला.

कलाकारांनी जिंकली उपस्थितांची मने

यंदा मिरवणुकीत सुमारे ३५ चित्ररथ, १८ रोमटामेळ, आणि पारंपरिक नृत्यगटांनी सहभाग घेतला होता. प्रत्येक चित्ररथ भारतीय संस्कृती, पुराणकथा आणि समाज प्रबोधनाच्या वेगवेगळ्या विषयांवर प्रकाश टाकत होता. नृत्यगटांनी ढोल-ताशांच्या गजरात उड्या मारत, नृत्य करत उपस्थितांची मने जिंकली. गोव्याच्या ग्रामीण भागातून आलेले कलाकार आपला सांस्कृतिक वारसा सादर करत होते. रोमटामेळात सहभागी झालेले कलाकार, पारंपरिक पोशाखात ताशाच्या ठेक्यावर बेधुंद नाचत होते. काही पर्यटकांनीही यात सहभाग घेतला. वातावरणात वाऱ्यासोबत ढोलाचा नाद घुमत होता आणि प्रत्येकजण त्या लयीत झुलत होता.