Goa Crime: पर्वरी खंडणी प्रकरण! सात संंशयितांविरुद्ध आरोप निश्‍चितीचा आदेश; खटल्याची सुनावणी होणार सुरू

Porvorim Truck Robbery Case By Fake Anti-Corruption Department Officer

पणजी: लाचलुचपत प्रतिबंधक विभागाचे अधिकारी असल्याचे भासवून पर्वरी येथे रात्रीच्यावेळी दोन ट्रक अडवून चालक व क्लिनर्सकडून सुमारे ५ लाखांची खंडणीवसुली व दरोडाप्रकरणी संशयित विनायक ऊर्फ लुलू नाईक, साई दळवी, फिरोझ शेख, प्रसाद नाईक, हुसेनसाब ऊर्फ नझीर तशिलदार, श्रीकांत मोहन देवरपल्ली व वहिदाबानू हवेरी या सातजणांविरुद्ध आरोप निश्‍चित करण्याचा आदेश पणजी सत्र न्यायालयाने दिला.

पोलिसांनी न्यायालयात सादर केलेल्या आरोपपत्रात संशयितांविरुद्ध भादंसं कलम १७०, ३४१, ३८४, ३८५, ३९५, ३६५ व १२० बी खाली सादर केलेले पुरावे पुरेसे आहेत. संशयित पाचपेक्षा अधिक असल्याने हा दरोड्याचा गुन्हा ठरतो. त्यांनी कटकारस्थान रचून ट्रक चालकांना लुटण्याचा गुन्हा केला आहे, असे निरीक्षण नोंदवत या खटल्यावरील सुनावणी सुरू करण्याचे निर्देश दिले आहेत.

मद्यसाठा असलेले दोन ट्रक मडगाव येथून १० मे २०१९ रोजी संध्याकाळच्यावेळी निघाले होते. संशयितांनी एका चारचाकी व एका दुचाकीवरून या ट्रकचा पाठलाग केला. जेव्हा हे ट्रक पर्वरी येथील आयकॉन शोरूमच्या ठिकाणी पोहचले असता या वाहनातील ७ संशयितांनी ते ट्रक अडवले.

ट्रक चालक व क्लिनर्सकडे मद्यसाठ्यासंदर्भात कागदपत्रांची तपासणीसाठी मागणी केली. ते लाचलुचपत प्रतिबंधक विभागाचे अधिकारी असल्याचे सांगितले. हे प्रकरण मिटवण्यासाठी त्यांच्याकडे ५ लाखांची खंडणी मागण्यात आली. हे पैसे घेतल्यानंतर संशयितांनी दोन्ही ट्रकच्या चालक व क्लिनर्सचे अपहरण करून त्यांना निर्जनस्थळी नेऊन सोडले. तेथेही त्यांच्याकडे असलेले ४५ हजार रुपये संशयितांनी घेतले.

आणखी ३ लाखांची मागणी केली, मात्र त्यांच्याकडे नसल्याने त्यांना तेथेच टाकून पळून गेले. याप्रकरणाची माहिती ट्रक मालकाला चालक व क्लिनर्सनी दिली असता पर्वरी पोलिसांत फ्रासिस डिसोझा याने तक्रार दाखल केली. पोलिसांनी याप्रकरणाचा छडा लावत सातही संशयितांना गजाआड केले व त्यांच्याविरुद्ध दरोड्याचा गुन्हा नोंद केला होता.