Goa Smart City: पणजी होणार 'स्मार्ट आणि सुरक्षित'; उर्वरित भागातही बसवले जाणार सीसीटीव्ही

पणजी: पणजी शहरातील पर्यटक आणि स्थानिक नागरिकांच्या सुरक्षेला अधिक बळकटी देण्यासाठी मिरामार किनारपट्टी व पणजी प्रोमेनेड परिसरात अत्याधुनिक सीसीटीव्ही कॅमेरे बसविण्याचा निर्णय घेण्यात आला आहे. या पार्श्वभूमीवर महापौर रोहित मोन्सेरात, पणजी शहर पोलीस ठाण्याचे पोलीस निरीक्षक विजयकुमार चोडणकर तसेच स्मार्ट सिटीच्या वरिष्ठ अधिकाऱ्यांनी संयुक्तपणे परिसराची प्रत्यक्ष पाहणी केली.

महापौर रोहित मोन्सेरात म्हणाले, किनारी भागात सीसीटीव्ही कॅमेऱ्यांचे जाळे उभारल्याने आणि देखरेख वाढल्याने गुन्हेगारी प्रवृत्तींना आळा बसण्यास मदत होईल. तसेच स्थानिक रहिवासी आणि पर्यटकांसाठी अधिक सुरक्षित व निर्भय वातावरण निर्माण होईल.

मिरामार किनारा आणि पणजी प्रोमेनेड हा परिसर पर्यटकांसह स्थानिक नागरिकांच्या पसंतीचे फिरण्याचे ठिकाण असून येथे दिवस-रात्र मोठी वर्दळ असते. त्यामुळे या भागावर चोवीस तास प्रभावी नजर ठेवण्याची आवश्यकता निर्माण झाली आहे. यासाठी सीसीटीव्ही कॅमेरे बसविण्यास योग्य आणि मोक्याच्या जागांची निश्चिती करण्यासाठी ही संयुक्त पाहणी करण्यात आली.

अधिकारी व पोलिसांनी प्रोमेनेडवरील प्रमुख मार्ग, गर्दीची ठिकाणे, प्रवेशद्वारे आणि इतर संवेदनशील भागांचे मूल्यांकन केले. ज्या ठिकाणी सातत्याने देखरेख आवश्यक आहे, अशा जागांची प्राथमिक निवड करण्यात आली असून या ठिकाणी सीसीटीव्ही यंत्रणा उभारण्यात येणार आाहे. त्यामुळे सुरक्षा व्यवस्थेला तंत्रज्ञानाची जोड मिळणार आहे.