Panaji Market : पावसामुळे भाजी उत्पादन घटले; टोमॅटोसह 'गोमंतकीय तवशी'ही महाग

Panaji Market : बाजारात खास गोमंतकीय ‘तवशी’ दाखल झाली असून शंभर रुपयांना पाच तवशी विकल्या जात आहेेत. खास फोंडा, वेर्णा परिसरात मोठ्या प्रमाणात पिक आले आहे. परंतु दर मात्र महागडेच आहेत.

पावसामुळे भाजी उत्पादनात घट झाली आहे. टोमॅटोसह, सर्वच भाजीचे दर वाढलेले आहेत. फक्त कांदा आणि बटाट्याचा दर स्थिर आहे.

टोमॅटो १४० ते १५० रुपये प्रती किलो दराने विकला जात असल्याने मध्यमवर्गीयांच्या आहारातून टोमॅटो जणू गायबच झाला आहे. स्थानिक भाजी उपलब्ध झाली असूनही दर मात्र चढेच आहेत. काकडीचे दरही शंभर रुपयांना पाच काकड्या असाच आहे.

जीवनावश्‍यक वस्तूंचे दर दिवसेंदिवस वाढत चालले आहेत. महागाईने सर्वसामान्य तसेच मध्यमवर्गीय नागरिकांचे खिसे रिकामे होत आहेत. भाजीपाल्याच्या दरांतही मोठी वाढ झाली. येत्या काळात भाजीपाल्याचे दर आणखी वधारण्याची शक्यता नाकारता येत नाही.

कारण बेळगावसह कोल्हापूर, सांगली, हुबळी मार्केटमध्ये भाजीची आवक कमी आहे. गेल्या आठवड्यातील पावसामुळे भाजीचे नुकसान झाले आहे. किमान वीस दिवस महागाई कायम राहणार असल्याचे व्यापाऱ्यांचे मत आहे.

रानभाज्या बाजारात दाखल

पणजी मार्केटमध्ये टायखिळा, कुडूक, फांगला, कोंब तसेच इतर रानभाज्या विक्रीसाठी येत असून त्यांना चांगली मागणी आहे.

ग्रामीण भागात रान भाज्या मुबलक प्रमाणात उपलब्ध आहेत. त्यामुळे भाजीचे दर वाढले तरी ग्रामीण भागात फारसा परिणाम झालेला नाही. सगळीकडे रानभाज्या मिळत आहेत.

फलोत्पादनातील भाजी दर

• भेंडी ४६ रू

• कोबी २१

• गाजर ३७

• फ्लावर ३५

• हिरवी मिरची ६५

• कांदा २४

• बटाटे २७

• टोमॅटो १०८

भाजी प्रतिकिलो

• टोमॅटो १२०-१४०

• कांदा ३०

• बटाटा ४०

• कारली ८०

• भेंडी ६०

• कोबी ४०

• फ्लॉवर ४०