New Education Policy: नव्या शिक्षण धोरणाची रूपरेषा पुढील आठवड्यात! यंदापासूनच अंमलबजावणी

New Education Policy: नव्या राष्ट्रीय शिक्षण धोरणाची अंमलबजावणी राज्यात यंदापासून करण्यात येणार आहे. त्याबाबतची अधिसूचना यापूर्वीच निघाली आहे. शिक्षण खात्याने धोरण राबविण्यासाठी कंबर कसली आहे. पुढील आठवड्यात या धोरणाची रूपरेषा जाहीर होईल, असे सांगण्यात आले आहे.

शिक्षण खात्याचे सचिव प्रसाद लोलयेकर यांच्या मार्गदर्शनाखाली खात्याच्या बैठकांचे सत्र सुरू आहे. पुढील महिन्यात नवीन शैक्षणिक वर्ष सुरू होत आहे. त्यामुळे शिक्षण खात्याच्या वतीने राबवण्यात येणाऱ्या नव्या धोरणाची रूपरेखा लवकरच सचिव जाहीर करणार असल्याची माहिती सूत्रांनी दिली आहे.

नवे राष्ट्रीय शिक्षण धोरण कधी जाहीर होणार, याविषयी शिक्षण क्षेत्रासह पालकांमध्येही कमालीची उत्सुकता आहे. तसेच ते कशा पद्धतीने राबविण्यात येणार, याकडेही लक्ष लागले आहे. पुढील आठवड्यात जाहीर होणाऱ्या नव्या शिक्षण धोरणाच्या रूपरेखेविषयी शिक्षण अभ्यासकांचे विशेष लक्ष असेल.

चर्चा आणि आढावा

अगोदरच विलंब झालेल्या धोरणानुसार केजी, किडिंगस्कूल तथा तत्सम लहानग्यांना शिक्षण देणाऱ्या केंद्रांना हे धोरण राबवावे लागणार आहे. पायाभूत शिक्षणाशी हे शिक्षण असल्याने त्याची अंमलबजावणीही योग्य पद्धतीने आणि सुलभरित्या व्हावी, यासाठी शिक्षण खाते कसोशीने प्रयत्न करीत आहे. त्यासाठी सचिव लोलयेकर यांना हे शिवधनुष्य उचलण्याची वेळ आली आहे. सध्या बैठका, चर्चा आणि आढावा असे चित्र खात्यात दिसत आहे.